Këshilla dhe teknika për të përmirësuar fotografimin tuaj të ushqimeve

Fotografimi i ushqimeve është jashtëzakonisht i përhapur në rrjetet sociale. Mjafton t’i hedhësh një sy Instagramit për të kuptuar se na pëlqen shumë të ndajmë fotografi ushqimesh. Shpërndarja e një fotografie ushqimi është e ngjashme me ndarjen e ushqimit me të tjerët. Ka diçka të përbashkët në lidhje me të, pothuajse sikur po e ndani bukën bashkë.

Postimi i fotografive të ushqimit në internet u shfaq si modë në të njëjtën kohë kur Instagrami, platforma e rrjetit social bazuar në imazhe, u bë jashtëzakonisht i përdorur.

Për fotografët e dhënë pas fotografive të ushqimeve të shijshme, kjo gjë paraqitet si sfidë sepse, me aq shumë fotografi ushqimesh, është e vështirë të shquhesh midis publikimeve të shumta. Yasmin Albatoul , fotografe profesioniste dhe influencuese për fotografi ushqimesh, rezidente në Algjeri, e njeh shumë mirë këtë sfidë. Ajo është përballur edhe me sfida të tjera.

“Si grua, këtu ku jetoj, nuk mund të udhëtoj e vetme ose të lëviz nëpër qytet për të shkrepur fotografi në rrugë,” thotë ajo. “Kur isha në universitet, shoqet më thonin gjithmonë: “Nuk mund ta sigurosh jetesën me fotografi, është thjesht një hobi”. Por unë i thoja: “Po, unë mundem. Do të shkrep fotografi në shtëpi.”

Si përfundim Yasmin kishte të drejtë. Tani ajo është një fotografe profesioniste. Shkrepjet e saj dinamike, plot ngjyra dhe shpesh surreale të tërheqin vëmendjen – dhe mund t’ju bëjnë t’ju shkojë goja lëng. Stili i saj unik dhe imazhet mahnitëse i kanë sjellë mjaft prenotime për fotografi tregtare dhe Instagrami i saj ka një audiencë prej 105 000 ndjekësish (në rritje).

Ajo çka i bën fotografitë e Yasmin të spikasin në Instagram është prekja e tyre profesionale. Ka një ndryshim madhor, thotë ajo, midis shkrepjes së fotografisë së ushqimit në restorant para të ngrënit dhe stilimit të ushqimit për fotografim tregtar me një kamera profesionale.

“Shumica e njerëzve fotografojnë ushqime në restorant me anë të celularit, pa planifikuar paraprakisht dhe pa mjete shtesë,” thotë ajo. “Këto janë fotografi spontane që shpërndahen në rrjetet e tyre sociale nëpërmjet historive, por kur flasim për fotografi profesionale ose tregtare, është çështje tjetër.”

Nëse jeni të interesuar për ta bërë fotografimin e ushqimeve më profesional, atëherë gjëja kryesore sipas Yasmin është t’i qasesh punës në mënyrë krijuese. Yasmin i kushton një vëmendje të madhe kompozimit të fotografive të saj sipas ngjyrës dhe shtimit të lëvizjes, gjë që e arrin me anë të rekuizitave befasuese – si p.sh. spango dhe vaj.

“Nuk ia bëj dot pa një shishe vaj dhe furçë, sepse dua që ushqimi të shkëlqejë.”

Vijoni të lexoni për më shumë detaje rreth këshillave dhe teknikave të saj për të shkrepur fotografi profesionale ushqimesh.

Për sa i përket perceptimit të ngjyrave, njerëzit kanë avantazh mbi shumicën e kafshëve. Shumica e shkencëtarëve pohojnë se një nga arsyet se përse ne i shohim ngjyrat është sepse paraardhësit tanë kishin nevojë të dallonin frutat dhe të përcaktonin pjekurinë e tyre.

“Ngjyrat i zgjedh sipas atmosferës së përgjithshme të restorantit apo ushqimit dhe mjedisit nga i cili vjen. Për shembull, parapëlqej ngjyrën blu si sfond për frutat e detit, pasi simbolizon prejardhjen e tyre.”

Është më se e arsyeshme që ngjyra të ketë vëmendjen kryesore në fotografimin e ushqimeve. Ngjyrat rrëmbejnë vëmendjen tonë. Dhe kombinimi i ngjyrave të duhura mund ta bëjë kompozimin të spikasë, duke e shfaqur si të ndritshëm dhe të gjallë.

“Ngjyra blu shkon për mrekulli me ngjyrën portokalli të karkalecave të detit, për shembull. Zgjedhja e elementeve në çdo fotografi, përfshi ngjyrën e sfondit, varet nga subjekti kryesor.”

Si fotograf ushqimi, duhet të kapni më shumë sesa vetëm ushqimin. Enët dhe serviset janë dy shembuj të elementeve që shoqërojnë ushqimin. Por tasi në të cilin fotografohet ushqimi nuk duhet të jetë tas që e përdorni në përditshmëri. Duhet të kompletojë pjesën tjetër të pamjes. Një rregull tjetër kryesor është gjetja e një tasi pak më të madh se mesatarja për të treguar ushqim me bollëk.

“Kur hamë, zakonisht e shërbejmë ushqimin në një pjatë të bardhë të thjeshtë. Kjo është arsyeja pse zgjedhja e enëve dhe serviseve që duken luksoze, në mënyrë që ushqimi të duket më bukur, është me rëndësi të veçantë.”

Për sa u përket rekuizitave për të stiluar fotografitë e ushqimeve, nuk duhet të mendoni vetëm për ngjyrat. Duhet të keni parasysh edhe materialin dhe estetikën e përgjithshme të artikullit. Lugët e drurit, për shembull, duken më natyrale se ato metalike dhe nuk e reflektojnë dritën, gjë që i bën mjaft të preferuara në shumë fotografi.

Sigurisht që mund ta paraqitni ushqimin në pjatë, por ka edhe opsione të tjera. Një pllakë mermeri mund të japë përshtypjen e pompozitetit, madhështisë dhe sofistikimit. (Këto janë të shkëlqyera edhe për të fotografuar ëmbëlsira të ftohta si akullorja, pasi i mban të freskëta.) Edhe mbajtëset e tortave janë alternativë tepër e goditur për ta paraqitur ushqimin me një theks të veçantë.

Rekuizitat e tjera, si p.sh. barishtet e freskëta, shprehin freski dhe shije, duke shtuar edhe një dimension të ri ngjyrash dhe teksturash. Erëzat dhe kokrrizat shumëngjyrëshe shprehin larmi shijesh. Mos harroni mbulesat e tavolinave dhe artikujt e tjerë të kuzhinës për të shtuar ngjyrën e dëshiruar në kuadër.

Në çdo zhanër fotografie, ka disa marifete që zakonisht i mëson vetëm nga përvoja. Në këtë rast, kemi pyetur Yasmin, dhe mund të zbulojmë disa sekrete profesionale se si mund ta kombinojmë dhe stilojmë ushqimin.

“Një nga gjërat më kryesore në fotografinë e ushqimeve është të shtosh disa marifete për ta bërë ushqimin të duket i shijshëm dhe të zgjasë sa më shumë të jetë e mundur,” thotë Yasmin.

Disa nga këto marifete për ta bërë ushqimin të duket i shijshëm nuk janë domosdoshmërisht të shijshme – si p.sh. të hedhësh vaj motori mbi petulla.

“Mund të përdorim detergjentin e enëve për ta mbajtur shkumën e kafesë sa më gjatë të jetë e mundur. Gjithashtu, e vajisim mishin që të duket me shkëlqim dhe më i shijshëm. Kremin pana e zëvendësojmë me shkumë shampoje sepse zgjat më shumë dhe nuk prishet nga nxehtësia e dritave.”

Në përgjithësi, ushqimi nuk lëviz. Për këtë arsye, paraqitjet e ushqimeve në piktura janë zakonisht të kompozuara si “natyrë e qetë”. Por fotografia moderne mund t’u japë jetë pamjeve më shumë nga ç’mund ta kishin imagjinuar ndonjëherë piktorët si Monet.

“Lëvizja në fotografi na tregon një histori interesante. Kur shikon një pamje me një kompozim statik, mund të duket e mërzitshme. Asgjë s’po ndodh. Mund të mos e mbani mend pikturën më vonë. Ndërsa shtimi i lëvizjes në fotografi e bën atë unike dhe të paharrueshme.”

Të shikosh imazhet e ushqimeve të Yasmin, shumica e të cilave janë fotografuar në lëvizje, tregon se tërheqëse është një fotografi dinamike ushqimi. Në shumicën e punës së saj, ushqimi duket sikur po “montohet”, me një spërkatje përfundimtare të kapur në ajër. Herë të tjera, Yasmin krijon imazhe që e shfaqin ushqimin duke u shpërbërë, për të treguar përbërësit e tij, siç tregohet më sipër.

Yasmin thotë se ajo përdor shkopinj të hollë prej druri dhe ngjitës për të vendosur copa të vogla ushqimi në pozicione të tilla që krijojnë iluzionin e lëvizjes në fotografi. Pastaj i heq më vonë shkopinjtë me zgjuarsi duke përdorur softuerë modifikimi. Nëse doni të mbani diçka pezull në ajër, mund të përdorni spango.

“Elementët e fotografisë si p.sh. biskotat ose tortat mund të rregullohen me shkopinj druri,” thotë Yasmin.

Këto lloj teknikash janë të dobishme për të fotografuar skena me aksion si p.sh. skuqja e darkës në një tigan me fund të rrumbullakët. Mos harroni: lëvizja vjen në forma të ndryshme, nga djathi që ngjit në pjatë teksa tërhiqni një copë picë deri te avulli që ngrihet lehtë nga filxhani i kafesë.

Një modë e re në rrjetet sociale për fotografët profesionistë është “përgatitja kundër shkrepjes”. Këto imazhe të njëpasnjëshme ose video tregojnë procesin pas fotove mahnitëse, duke zbuluar pjesë nga puna pas çdo kompozimi.

Zbulimet janë frymëzuese për fotografë të tjerë, pasi u tregojnë magjinë që ndodh para se të shkrepet obturatori.

Mos harroni: nëpërmjet shpërndarjes së fotografive të ushqimit, mund të krijojmë lidhje me të tjerët. Ushqimin e asociojmë me afrimin me të tjerët, dhe kjo është një nga arsyet pse fotografimi i ushqimeve është bërë kaq i famshëm. Duke shpërndarë fotografi të ushqimit tuaj, një darkë private mund të shndërrohet në një vlerësim të ndërsjellë.

Një studim ka zbuluar se të fotografosh ushqimin ndikon pozitivisht edhe në shije. Shkencëtarët i kërkuan një grupi personash që po darkonin ta fotografonin ushqimin e tyre përpara se ta konsumonin. Një grup tjetër konsumoi të njëjtin ushqim, por pa e fotografuar. Grupi i parë, që e kishte fotografuar ushqimin, u shpreh se kishte shije më të mirë.

Fotografia e ushqimeve është për t’u përgëzuar, pasi na ndihmon të afrohemi me njëri-tjetrin. Ndoshta gjëja më e rëndësishme është që e bën ushqimin të ketë shije më të mirë.

Për të mësuar më shumë se si Yasmin shkrep fotografi mahnitëse të ushqimit, hidhini një sy kompletit të saj për fotografimin e ushqimeve.*


* I disponueshëm vetëm në gjuhët e përzgjedhura.