Këshilla për fotografi më të mira të peizazheve detare

Ka një arsye se përse fotografitë e peizazheve bregdetare janë një lloj kaq i përhapur i fotografisë së peizazheve. Kontrasti i fortë i bregut me detin, format që krijon drita teksa pasqyrohet në ujë dhe ndryshimet e befta në kushtet e motit i bëjnë peizazhet detare veçanërisht tërheqëse.

Fotografit italian dhe mësuesit të fotografisë Erik Colombo i pëlqen shumë fotografimi i peizazheve detare. Ai e përshkruan veten si “një fotograf 360°” i cili ka punuar në çdo zhanër të fotografisë, nga fotografitë e dasmave te fotografitë e modës së lartë, deri te videot komerciale, por pasioni i tij më i madh janë fotografitë e peizazheve dhe botës së egër . Ai ka udhëtuar shumë për të fotografuar “peizazhet më të egra dhe më të mrekullueshme të planetit tonë të bukur, nga malet tek oqeanet, nga akullnajat te vullkanet.” Ai gjithashtu i kushton shumë nga koha e tij mësimit të aftësive dhe njohurive të veta në kurse, trajnime në terren dhe turne fotografish.

Në këtë material do të gjeni bisedën tonë me Erik për këshilla për fotografimin e suksesshëm të peizazheve detare, si dhe do të gjeni të renditura disa nga kamerat dhe objektivat më të mira të Canon për fotografimin në plazh dhe fotografimin e peizazheve bregdetare.

"Kompozimi është gjëja më e rëndësishme në fotografi, por veçanërisht në fotografinë e peizazheve detare”, - thotë Erik. Ai këshillon të kaloni pak kohë në vendin të cilin synoni të fotografoni. “Eksplorimi pa kamerë të ndihmon shumë”, - shprehet ai. “Unë e nxjerr kamerën nga çanta vetëm pasi kam kaluar 20-30 minuta duke eksploruar një vend.”

Deti i hapur mund të jetë magjepsës në realitet, por një foto nuk arrin të kapë gjallërinë e tij. Kushtojuni vëmendje veçorive të bregdetit për të krijuar kompozime me elementet klasike si pikat e interesit në distanca të ndryshme, inkuadrimi asimetrik dhe linjat drejtuese. “Shkëmbinjtë janë elemente të përkryera për të krijuar një kompozim dinamik”, - shprehet Erik, “ndërsa ngjyrat e ngrohta të luleve mund të krijojnë një kontrast të mrekullueshëm me ngjyrat e ftohta të detit.”

Në peizazhet detare, vija e horizontit mund ta lartësojë ose shkatërrojë fotografinë. Shumë kamera kanë një nivelues elektronik, i cili mund të mbivendoset në imazhin në inkuadrues ose në ekranin e pasmë për të shmangur horizontet e anuara. EOS R7 ka prezantuar funksionin e nivelimit automatik, i cili përdor fotostabilizimin e integruar (IBIS) të kamerës për të niveluar çdo horizont paksa të anuar për të siguruar shkrepje të përkryera.

Pavarësisht kamerës që përdorni, Erik sugjeron gjithashtu aktivizimin e veçorisë së rrjetës për t’ju ndihmuar me realizimin e fotografive të niveluara, me teknikat klasike të kompozimit të tilla si rregulli i të tretave, si dhe me drejtvendosjen e elementeve diagonale në fotografi.

Kohët e sotme, shkrepja vertikale është po aq e rëndësishme sa shkrepja horizontale, madje edhe për peizazhet. Realizimi i fotografive të përshtatshme për platforma të ndryshme të mediave sociale është një pjesë kyçe e punës së shumë fotografëve, por është gjithashtu një mundësi për të kapur detaje interesante të cilat mund të mos jenë aq të dukshme në fotot horizontale.

“Më pëlqejnë shumë kompozimet vertikale”, - shprehet Erik. “Ato janë më interesante dhe më pak kaotike se kompozimet horizontale. Për foto të tilla, gjetja e një plani të parë të mirë nga afër është thelbësore për të realizuar fotografi interesante dhe unike.”

I njëjti vend mund të duket shumë ndryshe pasi intensiteti i dritës, drejtimi dhe ngjyrat ndryshojnë gjatë ditës. Nuk ekziston domosdoshmërisht një “kohë e duhur”, por herët në mëngjes dhe vonë në mbrëmje gjatë “orës së artë", si dhe pak përpara lindjes së diellit ose pak pas perëndimit të diellit gjatë “orës së kaltër” krijohen ngjyra më interesante se gjatë diellit të fortë të mesditës.

Nëse jeni duke fotografuar herët në mëngjes ose vonë gjatë ditës, mund të kapni disa peizazhe detare mbresëlënëse me njerëz, pemë dhe veçori të tjera të peizazhit, si dhe siluetat e strukturave të ndryshme. Megjithatë, për të kapur një gamë të gjerë detajesh dhe për të pasur më shumë liri në krijimtari, përdorni të njëjtën qasje si për fotografitë e tjera me dritë të ulët – përdorni një aperturë të gjerë (numër të ulët f) për të lejuar sa më shumë dritë, rrisni cilësimin e ISO-s, dhe zgjidhni një kamerë të krijuar për performancë të jashtëzakonshme në dritë të ulët, si për shembull kamerën EOS R System nga Canon.

Megjithatë, krahasuar me dritat e ulëta, ato të forta janë më sfiduese, si për shembull gjatë shkëlqimit të diellit të mesditës. Për këtë arsye EOS R50 dhe kamera të tjera të Canon përfshijnë funksione të tilla si një modalitet Scene Intelligent dhe modalitete të panoramës HDR (High Dynamic Range), të cilat janë perfekte për të fotografuar në kushte me kontrast të lartë dhe me reflektime të ndritshme si në plazh.

Nëse duhet të fotografoni patjetër në dritën e fortë të mesditës, Erik sugjeron përdorimin e një filtri ND (Neutral Density) për të ulur sasinë e dritës që futet në kamerë. Ai vet pëlqen të përdorë një filtër të fortë ND1000 me 10 ndalesa. “Kjo do të filtrojë sasinë e dritës në mënyrë që të mund të përdorni fotografinë me ekspozim të gjatë për të krijuar mjegullim të lëvizjes në det”, - thotë ai.

Erik e pëlqen këtë teknikë pasi krijimi i një ndjesie lëvizjeje në peizazhet detare mund të shtojë interesin në panorama që përndryshe nuk bien dhe shumë në sy. Dy pika kryesore ku duhet të fokusoheni janë deti dhe qielli, të cilat lëvizin relativisht ngadalë. Kapja e ndjesisë së lëvizjes së tyre (në vend të ngrirjes) kërkon një shpejtësi të ngadaltë të obturatorit dhe një mbajtëse të kamerës, zakonisht një trekëmbësh.

ISO e ulët dhe apertura e vogël (numër i lartë f) do të mundësojnë shpejtësi më të lartë të obturatorit. Për të shmangur dridhjet e kamerës gjatë shtypjes së butonit të obturatorit, mund të kontrolloni kamerën në distancë duke përdorur aplikacionin Canon Camera Connect . Provoni të shkrepni në një ekspozim të gjatë prej 10 sekondash ose më shumë për të parë se si retë lëvizëse dhe uji në det bashkohen në një ngjyrë të butë të mëndafshtë. Përndryshe, rriteni shpejtësinë e obturatorit në shpejtësi super të lartë për të kapur secilën nga stërkalat e dallgëve përplasëse.

Erik shpesh preferon që një pjesë e veçantë e panoramës të jetë në fokus të qartë dhe pjesa tjetër më e turbullt (thellësi e cekët e fushës). Në situata të tilla, ai përdor fokusin manual dhe një veçori të dobishme të kamerave Canon pa pasqyrë që ai përdor, fokusi manual MF me theksim të kontrasteve të larta. Kjo është veçanërisht e dobishme kur nivelet e dritës janë më të ulëta ose kushtet janë të mjegullta, duke e bërë fokusimin më të vështirë.

“Megjithësefokusi automatik është shumë i dobishëm”, - thotë ai, “kur kushtet e motit e vështirësojnë fokusimin, fokusi MF me theksim të kontrasteve të larta ju nxjerr nga situata.” Me këtë veçori të aktivizuar, mund të fokusoni manualisht me vetëbesim, pasi ekrani ose inkuadruesi i kamerës do të nxjerrë në pah ekzaktësisht atë që është në fokus duke theksuar pjesët e fokusuara të panoramës, dhe ju mund të shihni pjesët e theksuara që ndryshojnë teksa rregulloni fokusin.

Nga ana tjetër, në fotografitë e peizazheve, ndonjëherë dëshirojmë që në fokus të jetë një pjesë sa më e madhe e panoramës, nga plani i parë në sfond. Një teknikë fantastike për këtë quhet fokusimi në distancë hiperfokale. Distanca hiperfokale ndryshon sipas objektivit, aperturës dhe gjatësisë fokale që përdorni, ndaj mënyra më e mirë për të gjetur se ku duhet të fokusoheni është përdorimi i kalkulatorit të thellësisë së fushës dhe distancës hiperfokale në aplikacionin pa pagesë të Canon “Photo Companion”. Nëse nuk keni kohë për llogaritje, një rregull praktik është të fokusoni afërsisht një të tretën e panoramës.

Moti mund t’i bëjë fotot e peizazheve detare më interesante, qoftë me re të imta, të buta e të arta apo me re të ngarkuara e të errëta që paralajmërojnë stuhi. Identifikimi i kushteve të veçanta të motit dhe shfrytëzimi i tyre në aspektin fotografik do të përbënte një aftësi të mirë që ia vlen ta përvetësoni. “Gjithmonë u them studentëve të mi, nuk ka kushte të këqija moti, vetëm fotografë të këqij”, - thotë Erik. “Bukuria e fotografive të peizazheve është paparashikueshmëria e natyrës.

“Gjatë udhëtimeve të mia nëpër botë, kushtet më të mira të motit që kam gjetur kanë qenë gjithmonë pas një stuhie shiu.”

Fotografimi në një rrebesh të papritur? Është një mundësi dhe jo një problem. “Gjatë një stuhie në det”, - sugjeron Erik, “përdorni një objektiv zmadhimi për të kapur foto të dallgëve duke përdorur një shpejtësi të obturatorit prej rreth 1/1000 sek për të kapur piklat e dallgëve ose, përndryshe, një shpejtësi të ulët të obturatorit prej ndoshta 10 sekondash për të krijuar diçka abstrakte.”

Për të minimizuar peshën që duhet të mbajë, Erik shpesh merr vetëm një kamerë - një kamerë me kuadër të plotë EOS R System me objektiv zmadhimi RF me kënd të gjerë.

Për shkrepje me kënd ultra të gjerë, çka është një zgjedhje e shkëlqyer për peizazhet detare, një kamerë me kuadër të plotë, si EOS R8, së bashku me një objektivRF 15-30 mm F4.5-6.3 IS STM është një kombinim fantastik për kapjen e pamjeve me kënd të gjerë, i përshtatshëm për udhëtime. EOS R8 mund të shkrepë gjithashtu fotografi të njëpasnjëshme deri në 40 fps, çka është ideale për kapjen e momentit kur një dallgë përplaset me shkëmbinjtë.

Një alternativë më ekonomike, 24.2MP EOS R50 kombinuar me objektivin RF-S 18-150 mm F3.5-6.3 IS STM ose RF-S 55-210 mm F5-7.1 IS STM rezulton në një komplet edhe më të lehtë, të thjeshtë për t’u mbajtur, por shumë fleksibël, ideal për një ditë në bregdet.

Këto objektiva ju japin një gamë të gjerë dhe të larmishme të gjatësive fokale. Nëse dëshironi një opsion supertelefoto, RF 100-400 mm F5.6-8 IS USM është një zgjedhje e shkëlqyer kombinuar me një kamerë me kuadër të plotë, si dhe ju ofron më shumë fleksibilitet me kamerën APS-C.

Nëse keni objektiva EF dhe dëshironi t’i përdorni ato me kamerat EOS R System, Drop-In Filter Mount Adapter EF-EOS R ofron një bonus shtesë: jo vetëm që ju lejon të përdorni objektiva EF dhe EF-S pa humbje të cilësisë ose funksionalitetit, por gjithashtu ju lejon të përdorni filtra shtesë për reduktimin e dritës që futet në kamerë. Ai është i disponueshëm me një filtër V-ND ose një filtër polarizues rrethor, të dy të paçmueshëm në dritën e fortë në bregdet.

Bregdeti nuk është vetëm një vend për t’u argëtuar me miqtë dhe familjen, por një vend plot potencial për fotografi të shkëlqyera peizazhesh pavarësisht motit.


Shkruar nga Astrid Pitman & Sarah Bakkland