Fotografimi i faunës së egër: një profesionist dhe një amator testojnë Canon RF 200-800mm F6.3-9 IS USM

Fauna e egër është një zhanër si asnjë tjetër – çdo moment është një mundësi për t'i lënë rrugë të lirë të jashtëzakonshmes, por bukuria e saj e vërtetë qëndron në faktin që çdokush mund ta provojë. Ish-oficeri zjarrfikës Pete Lau tashmë një amator fotografie i pasionuar, e vërtetoi këtë gjë gjatë një seance fotografimi të faunës së egër bashkë me fotografin profesional të natyrës dhe të peizazheve, Guy Edwardes, në Hawk Conservancy Trust (Parku i ruajtjes së fajkonjve), në Hampshire, MB.

Guy preferon që t'i fotografojë kafshët në nivelin e tyre të syve. "Nëse subjekti është në bar, rërë ose ujë, atëherë do të shtrihem në tokë ose do të fotografoj nga këndi më i poshtëm i mundshëm", - shpjegon ai. "Kështu ti merr një shpërndarje interesante në plan të parë dhe kjo e nxjerr sfondin jashtë fokusit shumë më shpejt. Edhe një rregullim i vogël prej 15-30 cm mund të bëjë një ndryshim të madh në pamjen e fotografisë. Gjithashtu, kur fotografoni shpendë grabitqarë, kjo ju lejon që të fshihni litarët [të lidhur pas këmbëve të shpendit]."

Shtrirja në tokë, edhe pse me ndihmën e Guy, ishte e pamundur për Pete. Fatmirësisht, dyshja e gjeti zgjidhjen – të përdornin ekranin me prekje me kënd të ndryshueshëm Canon EOS R7. "Mbajtja e kamerës në cepin e karriges së tij me rrota dhe përdorimi i ekranit e ndihmoi Pete të fotografonte nga një kënd shumë i ulët", - thotë Guy. "Ai e uli kamerën rreth 30 cm afër tokës dhe kjo e ndryshoi plotësisht pamjen e fotografive të tij."

Pete, i cili ka qenë një amator i pasionuar për disa vite me radhë, thotë se kjo ishte e pazakontë për të. "Është fantastike sepse më dha shumë më tepër fleksibilitet", - thotë ai.

"Edhe kur keni një subjekt shumë të madh, si p.sh. një buf, kjo ndonjëherë nuk mjafton. Duhet të mendoni për sfondin", - thotë Guy, duke shpjeguar se edhe lëvizja më e vogël mund të bëjë një ndryshim të madh. "Rrezja 800 mm e RF 200-800mm F6.3-9 IS USM ju jep një fushëpamje shumë të ngushtë, kështu që për të ndryshuar plotësisht sfondin ju duhet vetëm të ndryshoni paksa pozicionin tuaj të trupit."

Pete u habit që një ndryshim i vogël i pozicionit të karriges së tij me rrota i mundësoi të përmirësonte dukshëm kompozimin e shkrepjeve të tij. "Mendoja se të duhej të lëvizje shumë, por jo", - thotë ai. "Si fillim, po bëja fotografi me sfonde të çrregullta, me degëza pemësh që dilnin sa andej-këtej, por lëvizja me vetëm disa inç në të majtë ose në të djathtë bëri një ndryshim të madh."

Guy zakonisht përdor objektivin Canon RF 600mm F4L IS USM me një Canon Extender RF 1.4x për të fotografuar faunën e egër, por ai u mrekullua nga rrezja 800 mm e RF 200-800mm F6.3-9 IS USM. "Për sa i përket kyçjes së subjektit, RF 200-800mm F6.3-9 IS USM bëri një punë vërtet të mirë gjurmimi, edhe në ndriçim të ulët", - thotë ai. "Por ajo që është e mrekullueshme rreth shkrepjes në distancë është fokusimi i shpejtë automatik. Imagjinoni të fotografoni një zog që po fluturon drejt jush me një objektiv 800 mm. Subjekti do të jetë shumë larg dhe fokusimi automatik do të bëjë vetëm disa lëvizje të vogla për ta gjurmuar atë. Që zogu të dalë në të njëjtën madhësi brenda kuadrit me një objektiv 300 mm, subjekti duhet të jetë shumë më afër jush. Kjo do të thotë se elementi i objektivit duhet të lëvizë më shumë dhe më shpejt për ta mbajtur subjektin në fokus. Në thelb, sa më e gjatë të jetë gjatësia fokale, aq më lehtë do të realizohet fokusimi dhe aq më shumë efektiv do të rezultojë."

Gjatësia fokale prej 800 mm e RF 200-800mm F6.3-9 IS USM sjell gjithashtu edhe përfitime të tjera për Pete. "Mërzitem shumë kur nuk arrij t'u afrohem subjekteve", - thotë ai. "Nëse jam në rrugë ose në një shteg, jam fizikisht i kufizuar në atë hapësirë. Nëse dal jashtë shtegut, ka mundësi që të rrëzohem nga karrigia me rrota, kështu që kjo rreze fokale e objektivit është e mahnitshme. Mund të afrohem siç nuk kam mundur kurrë më parë."

Çiftimi i RF 200-800mm F6.3-9 IS USM me një kamerë APS-C, si p.sh. EOS R7 sjell një përfitim shumë të madh pasi sensori më i vogël e pret imazhin në mënyrë efikase, duke rritur kështu rrezen e objektivit. Në skajin fundor 800 mm të rrezes së objektivit, sensori APS-C ju jep të njëjtën fushëpamje si të jeni duke fotografuar me një objektiv telefoto 1280 mm në një kamerë me kuadër të plotë.

Guy shton se diçka tjetër e mrekullueshme rreth objektivit është diapazoni i tij i zmadhimit. "Nëse po përpiqeni të gjeni një zog në qiell dhe keni zmadhuar deri në 800 mm, do ta keni të vështirë që të identifikoni diçka", - shpjegon ai. "Filloni me një zmadhim prej 300 ose 400 mm, në mënyrë që të gjeni subjektin tuaj, më pas zmadhoni me 800 mm për të kapur një pamje kuadërmbushëse."

Për të fotografuar krijesa që lëvizin shpejt, Guy rekomandon që të mos e merrni stativin trikëmbësh me vete. "Shkrepja me kamerën në duar ju dhuron fleksibilitetin që ju nevojitet për të lëvizur shpejt ose në vende të ndryshme", - shpjegon ai. "Problemi i vetëm është nëse jeni duke fotografuar me një objektiv telefoto të rëndë dhe është e pamundur që ajo peshë të mbahet për shumë kohë."

Stabilizuesi i zakonshëm që përdor Pete është stativi njëkëmbësh, i cili gjithashtu e ndihmon atë me peshën e pajisjes së tij, por Guy i tregoi një teknikë të re. "Nëse i mbledh bërrylat dhe i vendos ato te pjesa e stomakut, kjo më jep akoma më shumë fleksibilitet gjatë gjurmimit të një subjekti që lëviz. Me stativin njëkëmbësh jam i kufizuar në atë nivel", - thotë ai. "Objektivi RF 200-800mm F6.3-9 IS USM është shumë i lehtë dhe mund ta manovroj me një dorë, ndërsa me disa objektiva të tjera, fotografimi mund të duket si një seancë me ngritje peshash.

"Dizajni është po ashtu i mirëmenduar", - shton ai. "Të gjitha elementet mund të arrihen me gishtin e madh të dorës ose me gishtat e tjerë dhe për një objektiv supertelefoto ky dizajn është kompakt dhe interesant."

Kur fotografoni faunën e egër, Guy rekomandon përdorimin e një shpejtësie të lartë të obturatorit. "Fotografoni në 1/2500 sek ose më shpejt, edhe nëse subjekti është një zog që ka qëndruar diku", - thotë ai. "Nëse fluturon papritur, do të jeni gati për këtë moment."

Shpejtësia e lartë e obturatorit jo vetëm që do të fiksojë lëvizjet e kafshës, por gjithashtu do të kompensojë për çdo lëvizje të paqëllimshme timen - shpjegon Pete. "Paqëndrueshmëria më shoqëron gjatë gjithë kohës", - shpjegon ai. "Nga kraharori e poshtë, nuk kam kontroll mbi atë që bën trupi im, kështu që kamera më lëkundet shumë. Rritja e shpejtësisë së obturatorit kompenson lëvizjet e zogut dhe çdo lëvizje timen. IS optik në RF 200-800mm F6.3-9 IS USM është thjesht i pabesueshëm; është një model revolucionar për personat si unë me aftësi ndryshe."

Për të siguruar një shpejtësi të lartë të obturatorit, Guy thotë se ka punuar pa probleme me ISO 6400, veçanërisht në pyjet në hije ku nivelet e dritës janë të ulëta. "Mendoj se njerëzit shqetësohen shume për ISO-t e larta dhe zhurmat", - thotë ai. "Më mirë të kesh një fotografi të mprehtë dhe të qartë që mund të ketë pak zhurmë, gjë të cilën mund ta rregulloj më vonë me anë të softuerëve, se sa të mos arrij ta shkrep fotografinë." Gjithashtu, teknologjitë e reduktimit të zhurmës dhe performancës së ISO-s së lartë në kamerat moderne bëjnë të mundur përftimin e imazheve më të qarta seç prisni në ISO më të larta.

Pavarësisht nëse po fotografoni shpendë ose kafshë të egra, teknikat e Guy, deklarata e Pete dhe një objektiv si ai i Canon RF 200-800mm F6.3-9 IS USM, me diapazonin e tij fleksibël të zmadhimit dhe me funksionet mbesëlënëse, do t'ju ndihmojnë të afroheni një hap më shumë drejt fotografimit të bukurisë së egër të natyrës. "Thjesht provojeni", - thotë Pete. "Mund ta bëjë kushdo. Dilni në natyrë dhe shihni se çfarë mund të bëni."


Shkruar nga Natalie Denton