Fotografia e portreteve krijuese

Përdoruesja e TikTok dhe fotografe autodidakte, Nina Collins, mendonte se karriera në fotografi ishte diçka e paarritshme, por ajo ishte e vendosur t'ia dilte mbanë. “Isha një studente pa lekë në xhep, por pavarësisht se studioja diçka krejtësisht pa lidhje me fototgrafinë, e dija që doja të punoja në fushën e fotografisë dhe për këtë më duhej të krijoja një katalog”, - shpjegon ajo. "Unë mësova vetë përmes kërkimeve të shumta, si dhe pas shumë provash e gabimesh."

Në vend që të postonte në platformat e saj të zakonshme, ku tashmë kishte një prani, Nina vendosi t'ia niste nga e para në TikTok. “Kisha frikë nga reagimet e këqija”, - shpjegon ajo. "Ndjeva se njerëzit do të ishin tepër kritikë dhe do të vinin re imperfeksionet në aftësitë e mia të redaktimit ose cilësimet e kamerës."

Ndërkaq reagimi ndaj videove të saj frymëzuese në TikTok ishte jashtëzakonisht pozitiv dhe ajo krijoi një audiencë. “Kisha kapur 20 mijë vetë në katër muajt e parë. Komentet e njerëzve ishin aq emocionuese dhe as që e dinin se kush isha. Nuk është se u duhej të thoshin gjëra të bukura – por komentonin sepse në të vërtetë u pëlqeu ajo që panë dhe kjo më dha vetëbesimin që më duhej.”

Seria e fotosesioneve të Nina-s 'Decades', ku ajo tregon modën, modelet e flokëve dhe stilet e fotografimit mes periudhave të ndryshme, kanë rezultuar veçanërisht të përhapura. Ajo gjithashtu i ofron shikuesit një pamje në procesin e saj të përgatitjes në prapaskenë, duke demonstruar se si çdokush mund të provojë të rikrijojë paraqitje të ndryshme. Qëllimi i saj tani është të frymëzojë të tjerët që të marrin një kamerë dhe ta provojnë vetë. "Unë i krijoj videot e mia në TikTok për të ndarë ide, metoda dhe zgjidhje, me shpresën se mund të përfitojnë njerëz të tjerë me pasion për fotografinë," - thotë ajo.

Këtu, Nina na tregon për thjeshtësinë pas kompletit të saj, mënyrën se si ajo i stilon fotot dhe ndan disa këshilla për të ngritur vetëbesimin kur pozoni për autoportretet tuaja krijuese.

“Unë jam e interesuar për modën, fotografinë editoriale dhe të portreteve, kështu që kur shoh se si ka evoluar më duket vërtet magjepsëse”, - shpjegon Nina. “Ka ndryshime të dukshme në veshje, flokë dhe grim, por edhe se si duken fotot për shkak të kompletit dhe të burimeve të disponueshme për kohën. "Decades" lindi nga dëshira ime për të krijuar një seri fotosh që paraqisnin këtë zhvillim.

"Kam mësuar shumë, veçanërisht se çfarë më pëlqeu dhe nuk më pëlqeu te secili portret, si stile të ndryshme redaktimi dhe poza, dhe kjo është diçka që do ta përfshij në autoportretet e ardhshme."

Nëse dëshironi të bëni një fotografim tuajin konceptual, Nina rekomandon krijimin e një tabele idesh. “Kam bërë një tabelë në Pinterest për çdo dekadë me veshjet, pozat dhe stilet e redaktimit”, - shpjegon ajo. "Kjo më ndihmoi që të mendoja se çfarë më duhej të bëja për të rikrijuar secilën pamje."

Nëse, si shumica e njerëzve, nuk keni akses në studio fotografie, mund të krijoni studion tuaj në shtëpi. Në fakt, Nina i krijon të gjitha pamjet e saj në shtëpi, duke u mbështetur në rekuizita, stilim dhe cilësinë e kamerës së saj Canon për të arritur pamjen që synon. "Gjithçka në konfigurimin tim është shumë elementare," - thotë ajo.

Gjithashtu nuk është se ju duhen as aksesorë të shtrenjtë. “Kam përdorur thuajse çdo gjë si sfond – peshqirë, çarçafë, batanije. Madje as nuk keni nevojë për stendë të mirëfilltë. I kam vendosur mbi karrige, mbi kanistra dhe madje i kam varur mbi kanatet e dollapëve. Gjithashtu mund të përdorni orendi të thjeshta shtëpiake, si p.sh. bimët, për të krijuar një sfond interesant."

Për t'u siguruar që fotot të jenë sa më të përballueshme, veshjet që zgjedh Nina zakonisht vijnë nga gardëroba e saj. “Përpiqem të gjej pamje nga epoka e zgjedhur me rroba që i kam tashmë”, - thotë ajo.

Nina rekomandon një aparat fotografik fleksibël si Canon EOS R6, të cilin e shoqëron me objektivin e saj të preferuar Canon RF 50mm F1.8 STM. I vogël, i lehtë dhe ekonomik, RF 50mm F1.8 STM është ideal në dritë të ulët dhe Nina-s i pëlqen rrezja e ulët e qartësisë, e cila ndihmon në krijimin e sfondeve me turbullim të bukur – diçka që ka sjellë dhe një të mirë tjetër: "Është vërtet i dobishëm kur përdorni një sfond që ka nevojë për hekur, pasi nuk mund t'i dalloni rrudhat," - thotë ajo. Mësoni më shumë rreth zgjedhjes së lenteve të përsosura për portrete në udhëzuesin tonë të kompletit.

Nina përfiton gjithashtu nga cilësia fotografike e EOS R6. “Është vërtet mahnitëse dhe u jep një pamje profesionale fotografive të mia që janë shkrepur me materiale shumë elementare në shtëpi”, - thotë ajo. Ekrani rrotullues i duket shumë dobishëm për të bërë fotografi me kohëmatës dhe i pëlqen sa e thjeshtë është lidhja me smartfonin e saj duke përdorur programin Canon Camera Connect.

Nuk ka nevojë të investoni as në pajisje të shtrenjta ndriçimi. "Tutorialet e mia janë krijuar që të jenë sa më të realizueshme, që do të thotë se kushdo mund ta provojë vetë në shtëpi,"- shpjegon Nina. “Nëse do të filloja të përdorja kuti ndriçimi e blice, kjo do të dilte jashtë synimit. Unë përdor gjithmonë zona të ndriçuara mirë pranë dritareve të mëdha. Ndonjëherë nëse dua të përfshij dhe hijet, përdor llamba dhe elektrikë të thjeshtë dore - por në përgjithësi nuk përdor gjë."

Nëse dëshironi të eksperimentoni me ndriçimin, mund të mësoni më shumë rreth krijimit të një kutie drite të butë të bërë vetë për portrete më të këndshme në udhëzuesin tonë se si të bëni aksesorët tuaj fotografikë.

Një qasje e thjeshtë është më e mira kur bëhet fjalë për nxjerrjen e autoportreteve, duke ju lejuar të përqendroheni në pozat dhe kompozimin tuaj. “Nuk më pëlqen t'i ndryshoj shumë cilësimet kur jam para kamerës”, - thotë Nina. “Unë përdor gjithmonë vetëfokusimin. Për portretet, EOS R6 ka një zbulim dhe gjurmim kaq të mrekullueshëm të fytyrës dhe syve, kështu që nuk ke si gabon. Unë zakonisht shkrep me f/1.8 për rreze të këndshme qartësie, rreth ISO800 dhe zakonisht në shpejtësi shkrehësi prej 1/125 sek."

Inkuadrimi i vetes, ndryshimi i cilësimeve dhe kontrolli i shkrehësit është i lehtë me programin Canon Camera Connect, që ju mundëson ta telekomandoni kamerën me Wi-Fi nga smartfoni, sërish pa qenë nevoja për ndonjë aksesor shtesë apo të shtrenjtë.

“Nuk e di nëse do të mund të bëja ndonjë nga autoportretet e mia pa të, të them të drejtën”, - thotë Nina. "Ke një pamje aq të qartë se si i inkuadron fotot, dhe mund ta përdorësh për të rregulluar cilësimet dhe si shkrehës. Kështu e bëj të gjithë përmbajtjen time."

“Unë e di se çfarë bën punë për mua, por e di që është e zakonshme dhe që të dalësh para kamerës dhe të ndihesh paksa në siklet. Mund të kuptoni se keni një 'kënd optimal', por kjo mund të bëjë që t'i nxirrni fotot ca si shumë të ngjashme," - shpjegon Nina.

"Përfshirja e rekuizitave ju jep diçka për të bashkëvepruar. Mund të më shihni duke përdorur syze dielli, ose ndonjë buzëkuq, ose në dekadën më të fundit që bëra – vitet 2000 – një telefon vezullues me palosje. Gjithashtu mund të shtoni lëvizje - provoni të lëvizni flokët, veshjen. Dhe mbani mend, askush tjetër nuk do t'i shohë fotot që nuk përdorni, kështu që thjesht provoni gjithçka!"

Nëse po shpresoni të arrini një pamje specifike, mendoni se si do t'i modifikoni fotot, qoftë kjo në programe si Digital Photo Professional (DPP) falas nga Canon apo Adobe Lightroom. "Për seritë e mia të dekadave veçanërisht u mbështeta shumë te redaktimi," - thotë Nina. “I hidja një sy tabelës dhe zgjidhja gjëra nga secila periudhë – si p.sh. zhurmën, ndriçimin dhe tonin. Imazhet nga vitet '60 dhe '70, për shembull, ishin shumë të gjelbra ose të verdha në ton. Këto variable kyçe i fiksoj dhe lëviz pastat me cilësimet në Lightroom derisa të marr diçka të kënaqshme."

Kur tregon se çfarë duhet për të krijuar një fotografi, është gjithnjë diçka që mirëpritet në TikTok. "Në kanale të tjera sociale mund të mendoni 'ah, kjo qenka një foto e mrekullueshme', por nuk do ta dini medoemos se çfarë duhet për ta krijuar," - shpjegon Nina. "Me TikTok mund të shihni pas perdes se si unë krijoj diçka nga asgjëja. Njerëzve u pëlqen sepse mendojnë se 'edhe unë mund ta bëj këtë'."

Gjithashtu ia vlen të mendosh për muzikën. Secili prej fotografimeve të Nina-s për "dekadat" përkon me një kolonë të përshtatshme zanore për periudhën që është zgjedhur me kujdes për impakt maksimal. “Përveç se ka lidhje me rastin, duhet të jetë dhe mjaftueshëm e njohur që ta dinë shikuesit. Gjithashtu duhet të jetë e përhapur aq sa dhe të tjerët ta kenë përdorur si tingull – sa më shumë njerëz që përdorin një tingull, aq më mirë është për algoritmin e TikTok, çka sjell më shumë ekspozim."

Shikoni Nina-n që përgatitet për fotografimin në TikTok dhe, me ndihmën e këshillave të saj, pse të mos zgjidhni një periudhë dhe ta provoni vetë? Ndajini krijimet në TikTok, duke i etiketuar me @canonemea.


Adobe dhe Lightroom janë ose marka tregtare të regjistruara ose marka tregtare të Adobe në SHBA dhe/ose shtete të tjera.


Shkruar nga Astrid Pitman