Si të shkrepni foto nga distanca – dhe pse t'ju duhet diçka e tillë

Shkrepja e distancës mund të duket si një teknikë e avancuar, por është shumë më e lehtë nga sa mendoni dhe ka disa përfitime të mëdha. Mësoni se si funksionon, kur ta përdorni dhe si do të vijë në ndihmë për lloje të ndryshme fotografie me këtë udhëzues të dobishëm.

Shkrepja e distancës është thjesht komandimi i kamerës dhe i shkrehësit nga një pajisje tjetër në vend të komandave mbi kamerë. Zgjidhja tradicionale për këtë ka qenë një kabllo shkrehësi distance, e cila mund të futej në kamerë, por tani është i mundur komandimi përmes lidhjes me valë. Një gamë e gjerë kamerash Canon kanë lidhje Wi-Fi dhe modelet e fundit duke përfshirë të gjitha kamerat e EOS R System kanë edhe Bluetooth. Me programin Canon Camera Connect, kjo ju jep mundësinë e komandimit të një sërë cilësimesh dhe për ta aktivizuar shkrehësin direkt nga smartfoni ose tableta juaj.

Ka disa të mira nga përdorimi i një shkrehësi distance. Së pari, duke qenë se nuk e prekni fizikisht kamerën, shmangni rrezikun e trazimit të saj kur tërhiqni shkrehësin, çka e bën një mënyrë të mirë për të evituar lëkundjen e kamerës dhe për të nxjerrë foto të mprehta. Së dyti, është gjithashtu i dobishëm për kapjen e fotografive që mund të jenë të vështira për t'u inkuadruar ndërsa mbani kamerën në duar, duke përfshirë fotot në grup me veten në foto ose fotot e kafshëve të ndrojtura në natyrë.

Shkrepja e distancës është një mjet i dobishëm për shumë zhanre të ndryshme fotografike, si p.sh.:

Shkrepja e distancës për fotografinë e peizazhit

Aktivizimi i shkrehësit nga distanca është ideal kur shkrepni peizazhe nga një stativ, veçanërisht kur përdorni ekspozime të gjata, sepse mosprekja e kamerës eviton lëkundjet e mundshme të kësaj. Kur jeni duke shkrepur me intervale, kjo ndihmon gjithashtu që të mos e tundni kamerën dhe të mos ndryshoni kuadrin, çka do të bënte që pamjet eventuale të videos të kërcenin në mënyrë shpërqendruese. Me programin Canon Camera Connect, mundësia e ndryshimit të cilësimeve nga një smartfon midis pozave ju bën gjithashtu të mundur që të mos ju duhet t'i ktheheni vazhdimisht kamerës apo të kontrolloni fotot në ekranin e saj. Mund të shtoni edhe vlerësime me yje duke përdorur pajisjen tuaj portative për të ndihmuar në zgjedhjen, shpërndarjen dhe përpunimin e mëtejshëm.

Shkrepja e distancës në fotografinë e kafshëve të egra

Shkrepja e distancës është ideale kur fotografoni ose filmoni subjekte të ndrojtura ose të pakapshme, si kafshët e egra. Mund ta vendosni kamerën në pikën më të mirë për të bërë fotografinë, edhe nëse kjo do të ishte diku ku do ta kishit vetë të rrezikshme për t'u pozicionuar, dhe më pas të fshiheni jashtë pamjes, në mënyrë që të mos i trembni subjektet apo të mos u ndikoni sjelljen e tyre natyrale. Shkrepja e distancës është fantastike për fotografimin nga afër dhe makro të subjekteve të vogla, ku edhe lëvizja më e vogël e kamerës në fakt do të zmadhohej, duke prishur kuadrin ose duke e nxjerrë subjektin jashtë fokusit. E njëjta gjë vlen nëse përdorni teknikën e grupimit të fokusit për të bërë një seri pozash makro me pjesë të ndryshme të subjektit në fokus, në mënyrë që të kombinohen në një imazh të vetëm me më shumë pjesë të mprehta - mbajtja e kamerës të qëndrueshme është thelbësore. Përsëri, mundësia e ndryshimit të cilësimeve dhe e kontrollit të pozave paraprakisht nga smartfoni, si dhe zmadhimi i pamjes për të kontrolluar fokusin, bën që të mos ju duhet të ktheheni vazhdimisht te kamera duke trazuar skenën. Kur ta keni kapur pozën, gjeoetiketimi – shtimi i të dhënave të vendndodhjes në foto nga smartfoni duke përdorur programin Canon Camera Connect – do t'ju japë një regjistrim të saktë se ku e keni pikasur atë kafshë të rrallë.

Astrofotografia me shkrepje të telekomanduar

Me astrofotografinë shpesh do t'ju duhet të shkrepni ekspozime shumë të gjata nga 30 minuta deri në disa orë. Mundësia e shkrepjes nga distanca bën që kamera të mos marrë dridhje gjatë tërheqjes së shkrehësit, çka është kritike për pamje të qarta të qiellit. Për më tepër, mund të jeni goxha larg kamerës, mbase dhe duke ndenjur në të ngrohtin e makinës apo në ndonjë strehë teksa prisni të mbarojë ekspozimi. Për astrofotografinë rrallë del nevoja të rregulloni shumë cilësime, por edhe nëse ju duhet, mund të kaloni nga fokusimi automatik në manual, duke e bërë çdo gjë nga distanca. Veç kësaj, mund ta mbani të fikur ekranin LCD të kamerës, çka do të thotë më pak dritë e padëshiruar për të prishur ekspozimin.

Fotografi portreti pa përdorur duart

Nëse dëshironi të provoni dorën tuaj në autoportretet krijuese, atëherë shkrepja e distancës është ideale. Inkduadrojeni veten me lehtësi dhe sigurohuni që të përfshini gjithçka që dëshironi në foto. Mundësia e ndryshimit të cilësimeve, p.sh. e aperturës, bën që të eksperimentoni me efekte të ndryshme pa pasur nevojë të ndryshosh kompozimin duke shkuar te kamera dhe sërish mbrapsht. Shkrepja e distancës është gjithashtu shumë e dobishme për pozat në grup, pasi mund të kontrolloni nëse janë përfshirë (dhe buzëqeshin) të gjithë pa e shqetësuar skenën. Shqyrtoni çdo pozë në vend dhe mund të rregulloni cilësimet sipas nevojës ose t'i zhvendosni njerëzit në pozicione më të mira përpara se grupi të shpërndahet.

Kur punoni në një fotoseancë në mjedis studioje, mund ta kontrolloni kamerën nga kompjuteri duke përdorur programin Canon EOS Utility, i cili ju jep një ekran edhe më të madh se pajisja portative – më shumë për këtë pas pak.

Canon ofron një sërë aksesorësh për të zgjedhur për shkrepjen në distancë. Canon Remote Switch RS-60E3 është një telekomandë me kabllo 60cm për kamerat EOS me fole tipi E3 dhe Remote Switch RS-80N3 është një shkrehës distance 80cm për kamerat EOS me fole tipi N3. Timer Remote Controller TC-80N3 (që mund të kërkojë gjithashtu Remote Control Adapter RA-E3) ju mundëson shkrepjen e fotove në intervale të rregullta për projekte me intervale pa prekur kamerën.

Sa u përket zgjidhjeve me valë, Canon Remote Controller RC-6 punon në distanca deri në 5 metra duke përdorur rrezet infra të kuqe. Canon Wireless Remote Control BR-E1 punon me kamera EOS të pajtueshme me Bluetooth në distanca deri në 5 metra.

Megjithatë, ju me siguri tashmë e keni kompletin që ju nevojitet për fotografimin në distancë. Programi Canon Camera Connect mund të shkarkohet falas për përdoruesit e iOS dhe Android dhe konfigurohet shpejt në smartfon ose tabletë. Është i pajtueshëm me një gamë të gjerë kamerash Canon – jo vetëm kamerat më të fundit pa pasqyrë, por edhe disa DSLR dhe kamera kompakte PowerShot.

Disa nga funksionet e programit funksionojnë me Bluetooth dhe të tjera kërkojnë lidhje Wi-Fi, ndaj mbajini të dyja aktive në pajisjen tuaj portative për të përfituar sa më shumë nga programi.

Lidhja me kamerën tuaj është një proces i drejtpërdrejtë, me udhëzime në ekran brenda programit për t'ju orientuar gjatë veprimit. Pasi të lidheni, do të keni disa opsione për të eksploruar, në varësi të modelit të kamerës, si p.sh. shkrepja në distancë, shtimi i vlerësimeve me yje në imazhe dhe transferimi i fotove dhe videove për t'i ndarë me të tjerët.

Duhet të jeni në gjendje të shihni një opsion të quajtur Remote Live View shooting, i cili do të shfaqë një figurë të drejtpërdrejtë të asaj që shikon kamera juaj. Nga këtu, mund të bëni rregullime në cilësime, si p.sh. pika e fokusit, shpejtësia e shkrehësit, apertura, ISO, balanca e së bardhës, kohëmatësi, matja etj. Ia vlen të mësoheni me ndërfaqen kur e konfiguroni për herë të parë.

Do të shihni gjithashtu një buton të madh të bardhë në ekran, të cilin thjesht prekni për të bërë foton. Nëse dëshironi të regjistroni video, kaloni tek ikona e videos në krye të ekranit për të kaluar në modalitetin e filmit.

Programi Canon Camera Connect shërben gjithashtu si një qendër për programet e tjera të dobishme për kamerën tuaj, si p.sh. programi image.canon për transferimin dhe ruajtjen e fotove në renë kompjuterike, duke e bërë dyqanin tuaj të vetëm për mjetet më të fundit. Me kamerat EOS R3, PowerShot ZOOM dhe kamerat e tjera EOS të qarkulluar nga viti 2022 e tutje, është gjithashtu i mundur përditësimi i programit të integruar të kamerës nëpërmjet programit Canon Camera Connect, duke e bërë më të thjeshtë se kurrë përditësimin me përmirësimet dhe funksionet më të reja.

Fokusimi nëpërmjet programit Canon Camera Connect është i lehtë. Mund të prekni rreth ekranit për të ndryshuar pikën AF dhe do të shikoni se objektivi fokusohet automatikisht aty ku vendosni pikën e fokusit.

Mbështetet gjithashtu fokusimi manual, i cili mund të jetë i dobishëm për fotografitë nga afër dhe makro ku dëshironi të rregulloni fokusin në subjekt. Një e mirë tjetër është se mund të kaloni nga fokusimi automatik në fokus manual pa pasur nevojë të ktheheni te kamera dhe të përdorni çelësin në objektiv – mund të shtypni butonin e fokusimit manual brenda programit dhe të përdorni shigjetat për të rregulluar fokusin manual.

Shkrepjen nga distanca nuk e bëni vetëm nëpërmjet smartfonit. Ka mënyra të tjera që mund të jenë më të përshtatshme, në varësi të nevojave tuaja.

EOS Utility është program Canon për kompjuterin që mundëson shkrepjen në distancë. Mund të përdoret me lidhje me valë ose USB, mundëson komandim të gjerë mbi kamerën dhe fotot mund të ruhen direkt në kompjuterin ose kartën tuaj të memories. Ky mund të jetë një opsion i shkëlqyeshëm për një mjedis studioje, duke ju mundësuar të shikoni fotot në ekranin e madh të kompjuterit, të rregulloni cilësimet dhe të siguroni inkuadrim të përsosur në pamjen e drejtpërdrejtë paraprake duke përdorur rrjete dhe mjete kompozimi. Mund ta përdorni gjithashtu në lidhje me programin Digital Photo Professional të Canon për të modifikuar dhe vlerësuar fotot që keni nxjerrë nga distanca.

Nëse dëshironi të përdorni kamerën si kamerë për internet, EOS Webcam Utility është një opsion i shkëlqyer. Mbështet një gamë të gjerë kamerash Canon dhe është krijuar për t'ju mundësuar përdorimin e kamerës për transmetim të drejtpërdrejtë dhe videotelefonata, çka e bën optimale për transmetim dhe regjistrim fragmentesh në kamerë.

Cilido qoftë modeli i kamerës suaj dhe çfarëdo lloj fotografie që të bëni, Canon ofron mënyra shkrepjeje ose filmimi nga distanca. Pse të mos e provoni shkrepjen në distancë?