Ushqimi në lëvizje: vënia në lëvizje e videografisë së ushqimit

Ushqimi ka fuqinë të bashkojë njerëz nga fusha të ndryshme të jetës dhe fotografia dhe videografia e ushqimit e kanë tërhequr vëmendjen e audiencës prej kohësh, veçanërisht me zhvillimin e mediave sociale. Por nuk është e thjeshtë që të kapni ushqimin në lëvizje, diçka që krijuesja e përmbajtjes Jessica Marsden-Urquhart e njeh shumë mirë.

Në llogarinë e saj në median sociale, Jessie Bakes Cakes, ku ajo ka më shume se 100 mijë ndjekës, Jessie krijon video me format të shkurtër të cilat theksojnë procesion krijues dhe orët e punës që duhen për të gatuar. Rrugëtimi i saj me fotografinë e ushqimit nisi gjatë karantinës. "Gjithmonë më ka pëlqyer gatimi i ëmbëlsirave dhe më kujtohet kur bëja fotografi të tmerrshme me telefonin tim në vitin 2013," qesh Jessie. "Në vitin 2020, fillova të mendoj më seriozisht për këtë, duke pyetur veten "Çfarë më pëlqen të bëj?"". Fillova të përmirësoj recetat e mia, por fillova të fokusohesha edhe më shumë në anën fotografike."

Këtu Jessie përshkruan udhëtimin e saj nga fotografia te videografia e ushqimeve dhe ndan këshilla e marifete praktike për të tjerët që po mendojnë të bëjnë video të ushqimeve.

Nuk është e nevojshme të përdorni videon për të përçuar lëvizjen në fotografinë e ushqimit. Fotografimi i ëmbëlsirave me kanellë duke u spërkatur me krem djathi është më se i mjaftueshëm për të ndryshuar perceptimin e shikuesit të këtyre imazheve. Sidoqoftë, kalimi në videografi i shton një dimension tërësisht të ri përmbajtjes suaj. Mënyra se si duket ushqimi ndikon pamasë në shijimin e tij nga ana jonë dhe theksimi i teksturës dhe përmasave është shumë më i thjeshtë me video. Në thelb, ne na pëlqen të shikojmë imazhe ushqimi sepse duam që ta hamë atë dhe videot e shtojnë dëshirën tonë për ta ngrënë.

Gjithashtu, është thelbësore për krijuesit e përmbajtjes që të përshtaten me ndryshimin e peizazhit të mediave sociale. "Ajo çka zgjoi interesin tim për të kaluar nga fotografia te videografia ishte ndryshimi i tendencave," thotë Jessie. "E dija që duhet të mësoja se si të përdorja videon në mënyrë që karriera dhe biznesi im të lulëzonin."

Kompleti që përdorni për videografinë e ushqimit mund të ketë një ndikim të madh në punën tuaj, por nuk duhet të shpenzoni shumë para për të marrë rezultate të shkëlqyera. Jessie beson se zgjedhja e objektivit ka më shumë rëndësi se kamera dhe rekomandon një objektiv 50 mm me një aperturë të gjerë si p.sh. Canon RF 50mm F1.8 STM. "Kjo më jep rezolucionin dhe cilësinë që kërkoj," thotë ajo. Thellësia e ngushtë e fushës e bën ushqimin që të dalë në pah dhe sigurohet që të jetë në qendër të vëmendjes.

Jessie e ka përdorur objektivin e RF 100mm F2.8L MACRO IS USM të Canon-it edhe në këtë shkrepje dhe thotë se u dashurua menjëherë me atë. "Është ideale për të afruar ushqimin dhe mprehtësia e filmimit është e mrekullueshme," thotë ajo. "Më pëlqen ta përdor për të ekspozuar teksturat e shijshme të një gatimi të pjekur. Butoni i ndryshimit AF/MF e bën shumë të thjeshtë kalimin midis fokusimit manual kur dua ta mbaj fokusin te subjekti dhe fokusimit automatik kur dua të gjurmoj lëvizjen e një skene." Për më tepër, përdorimi i aperturës së ulët lejon që Jessie të theksojë ushqimin dhe të krijojë një sfond të turbullt dhe ëndërrimtar. Objektivi ka 5,5 nivele të Optical IS për filmim pamjesh pa lëkundje, por mund të ofrojë deri në 8 nivele kur përdoret së bashku me një kamerë me fotostabilizim të integruar (IBIS), si p.sh. Canon EOS R6 Mark II. Edhe motorët Dual Nano USM sigurojnë fokus të saktë automatik dhe me shpejtësi të lartë thuajse në qetësi në mënyrë që zhurma e objektivit të mos interferojë me subjektin tuaj.

Opsioni fleksibël Canon RF 24-105mm F4-7.1 IS STM është një opsion kompakt dhe me peshë të lehtë. "Gjatësia e gjerë fokale më lejon që të shkrep fotografi të gjata për të shfaqur të gjithë subjektin, dhe më pas ta zmadhoj për pamje nga afër, pa pasur nevojë të ndryshoj objektivin ose lëvizur stativin dhe pa humbur rezolucionin," thotë Jessie. "Gjithashtu, ai reagon shpejt ndaj lëvizjes dhe fokusohet te subjekti pa bërë zhurmë. I përsosur për video me zë." Ky objektiv ka deri në 5 nivele të Optical IS dhe nëse panoramoni objektivin tuaj me IS të aktivizuar, ai kalon automatikisht nga Standard IS në Panning IS. Kjo do të thotë që mund të bëni video dorazi dhe ta lëvizni kamerën për të kapur çdo detaj.

Për sa i përket kamerës, deri në vitin 2023, Jessie përdorte një APS-C DSLR para se të përdorte një më të mirë si Canon EOS R8 me kuadër të plotë pa pasqyrë. "Unë përdor ndriçim artificial, kështu që duhet të përputhet me kamerën, përndryshe përfundon me tonalitete të gjelbra dhe rozë," thotë ajo. "Aq më tepër me ushqimin, përveç se nëse nuk do që kremi të duket i verdhë. Kamera EOS R8 më ka ndihmuar shumë pasi më lejon që të caktojë një balancim të personalizuar të së bardhës në mënyrë që të marr pikërisht ngjyrat që po kërkoj."

EOS R8 është veçanërisht e mirë për video pasi regjistron 4K deri në 60p të mbimoduluar nga të dhënat 6K të sensorit, duke krijuar video 4K me cilësi më të mirë në krahasim me atë të regjistruar së brendshmi me rezolucion 4K. Gjithashtu, nuk duhet të shqetësoheni se mos humbni një sekuencë pasi EOS R8 ka një veçori pararegjistrimi e cila kap 3-5 sekonda të filmimit para se të shtypni butonin e regjistrimit.

Është e rëndësishme që të gjeni një zgjidhje që funksionon për ju. Krijimi i recetave, pjekja ose gatimi dhe më pas regjistrimi mund të jenë sfiduese dhe mund të kërkojnë shumë kohë. Kjo është arsyeja se përse Jessie është gjithmonë duke bërë shumë gjëra njëkohësisht. "Kur jam duke krijuar një recetë, mendoj gjithmonë se si do të përkthehet në video," thotë ajo. "Për shembull, kur jam duke shkruar një recetë për kek me çokollatë, mendoj "Tani është koha për copat e çokollatës, ja një pamje"". Me shumë mundësi do të filmosh 30 minuta të cilat më pas do t'i presësh në 30 sekonda, prandaj është e rëndësishme mbajtja shënim e pjesëve më të rëndësishme."

së pari, përmbajtja e Jessie-t është e përshtatshme për media sociale, pasi është e filmuar për t'u parë në një smartfon dhe ajo beson se modifikimi në telefon është një praktikë e mirë. "Unë nuk përdor softuerë të sofistikuar modifikimi," shpjegon ajo. "I transferoj videot e mia në telefon duke përdorur aplikacionin Canon Camera Connect dhe i modifikoj atje. Ka shumë aplikacione pa pagesë që mund të përdorni; nuk është e nevojshme të shpenzoni shumë për një abonim të shtrenjtë."

Ajo përdor edhe softuerin EOS Utility të Canon-it për të shfaqur në kohë reale atë që kamera është duke parë në laptopin e saj. "Të shohësh atë që sheh kamera në një ekran shumë më të madh të ndihmon vërtet shumë gjatë krijimit të skenës dhe kur jam në mes të xhirimit dhe duke kapur ushqimin në lëvizje," thotë Jessie. "Unë përdor shënuesit e rrjetës në softuerë për të më ndihmuar me vendosjen e saktë të objekteve në skenë. Gjithashtu, më jep kontroll të plotë mbi temperaturën e ngjyrave, e cila është e rëndësishme gjatë përdorimit të dritave artificiale për të marrë saktësinë më të mirë të ngjyrave."

Si EOS R8, ashtu dhe EOS R50 mund t'i shfaqin shënuesit e aspektit në kamerë, në mënyrë që skena të inkuadrohet saktë në varësi të platformës së medias sociale për të cilën po bëhet videoja. I gjithë kuadri është ende i dukshëm, por udhëzuesit tregojnë se ku do të pritet.

Jessie thotë që një nga gabimet më të zakonshme gjatë filmimit të një videoje është të mos dish si të kalosh midis modaliteteve Manual dhe AF. "Nëse po hiqni diçka nga pamja dhe dëshironi që fokusi të përqendrohet tek artikulli pas tij, përdorni autofokusin", shpjegon ajo. "Sidoqoftë, unë filmoj duke përdorur modalitetin Manual për të shmangur lëkundjen e fokusit pasi kjo gjë mund të jetë shpërqendruese."

Gjithashtu, është e rëndësishme të eksperimentoni me kënde të ndryshme kur xhironi një video gatimi. "Për shembull, një pamje nga sipër do të ishte e përsosur për një pamje të përzierjes së brumit të tortës në një tas sepse mund të ilustrosh lëvizjen dhe të tërheqësh vëmendjen e shikuesit," thotë ajo. "Edhe kalimi midis pamjeve nga afër dhe këndeve të gjera është i dobishëm, pasi mund të tregosh teksturat e ndryshme të ushqimit ose madhësinë."

Teksa mund të postoni shumë nga videot tuaja me shpejtësi dhe në kohë reale, eksperimentimi me ngadalësimin ose shpejtimin e tyre mund të ndikojë shumë te rezultati përfundimtar. Gjatë modifikimit, mund të shpejtoni edhe seksione të caktuara të një postimi në media sociale dhe të ngadalësoni të tjera. "Mund të filmoni një pamje në lëvizje të ngadalësuar dhe ta përdorni atë si hapje pasi lëvizja e ngadalësuar e bën gjithçka të duket luksoze!" thotë Jessie. Nga ana tjetër, ajo thotë, "shpejtimi i videove i jep atyre shumë energji." Kur ke kufizime kohore në postime, shpejtimi i videove mund të ndihmojë për më shumë përmbajtje brenda një periudhe të shkurtër kohore: "Edhe lëvizja e shpejtë është e dobishme kur nevojitet të përshtatni një filmim në një dritare prej pesë ose 10-sekondash," thotë Jessie.

Tendencat sociale ndryshojnë gjatë gjithë kohës. Një javë njerëzit janë të fiksuar me bukën e ëmbël me banane, ndërsa javën tjetër me kremin, çka mund të jetë e lodhshme për krijuesit e përmbajtjes. "Tendencat shkojnë dhe vijnë," thotë Jessie. "Thelbi është të marrësh atë që të pëlqen nga ajo tendencë dhe të mendosh, "Si mund ta përfshij këtë në punën time?" Jo, "Edhe unë duhet të bëj të njëjtën gjë"".

Jessie thekson edhe rëndësinë e të ruajturit të stilit dhe qasjes personale në videografinë e ushqimit. "Kjo është ajo çka u pëlqen markave ose klientëve me të cilët punoni; ata ju zgjedhin për individualitetin," shpjegon ajo. "Është e thjeshtë të frikësohesh nga personat me më shumë ndjekës, por përpjekja për të ndjekur ata dhe numrat e tyre nuk është mënyra më e mirë për sukses. Fokusohuni te arsyeja se përse po bëni atë që po bëni. Bëni atë që keni pasion, pasi ky pasion do të shkëlqejë përmes punës suaj. Kur mora klientin tim të parë, kisha vetëm 2000 ndjekës, kështu që nuk ju duhet një audiencë e madhe. Gjithashtu, mund të keni një biznes të suksesshëm me pak ndjekës.

"Është normale të keni dyshime te vetja," vazhdon ajo. "Ka kaq shumë gjëra që mund të të frymëzojnë; mund të jeni duke u përpjekur të krijoni diçka dhe të mendoni "Kjo nuk para i përshtatet stilit tim" ose "A është kjo vërtet ajo që më pëlqen mua?". Ndiqni intuitën tuaj. Në shumicën e rasteve, do të shpërblehesh."

Kështu që, herën tjetër kur jeni duke bërë një kek apo duke gatuar darkën, përse të mos eksperimentoni me aftësitë e kamerës suaj dhe këshillat në këtë artikull për të parë se çfarë mund të arrini?

Shkruar nga Nikita Achanta