Udhëzuesi i fillestarit për mbivendosjen e fokusit

Mbivendosja e fokusit është një metodë fotografimi me anë të së cilës bëhen disa shkrepje në distanca fokusimi (grupimi) që ndryshojnë shumë pak nga njëra tjetra dhe më pas përzien ose "mbivendosen" në një imazh të vetëm në mënyrë që të jenë subjekti ose skena të jetë më tepër në fokus. Ju mund t’i kombinoni imazhet tuaja duke përdorur softuer modifikimi, ose duke përdorur mjetet e mbivendosjes së fokusit brenda kamerës në kamerat Canon.

Kur shkrepni shumë afër subjektit tuaj, zakonisht përdoret një aperturë e gjerë (numri i ulët f) për ta lejuar dritën të hyjë sa më shumë që të jetë e mundur. Megjithatë, kjo ju jep një thellësi fushe shumë të ngushtë, çka do të thotë se pjesa më e madhe e subjektit ose skenës është jashtë fokusit. Mbivendosja e fokusit mund t'ju hapë dyert e botës së bukurisë së fshehur dhe detajeve të ndërlikuara të makrofotografisë, por është ideale edhe për peizazhe kur dëshironi që një skenë të jetë e mprehtë nga para-pas.

Me më shumë se një dekadë eksperiencë në fotografimin e natyrës, makrofotografi Matt Doogue është ekspert në mbivendosjen manuale të fokusit. Megjithatë, veçoritë e teknologjisë së fundit të EOS R System të kamerave pa pasqyrë të Canon-it mund t'ju ndihmojnë të arrini të njëjtin rezultat pa kurrfarë modifikimi. Duke përdorur veçoritë e grupimit të fokusit të integruar dhe të mbivendosjes sëEOS R7 dhe EOS R10 të Canon-it, mund të kapni nga afër pamje mahnitëse me shumë pak mundim.

Zgjedhja e kompletit më të mirë për fillestarët është shumë e rëndësishme për mbivendosjen e fokusit, por ju duhen edhe mënyra praktike për ta përdorur. Në këtë udhëzues, zbuloni se si Matt-i përdor mbivendosjen e fokusit për fotografi mahnitëse të natyrës, si manualisht ashtu dhe brenda kamerës. Me disa këshilla se si të shkrepni fotografi makro dhe me linjën e fundit të Canon EOS R System, shumë shpejt do të bëni fotografi jashtëzakonisht të mprehta.

Pavarësisht metodës që përdorni për të mbivendosur imazhet tuaja, faza e parë është shkrepja e disa fotografive në një cilësim të ndryshëm fokusi për të kapur thellësinë e plotë të fushës së subjektit që po fotografoni. Ky quhet grupim i fokusit,dhe pothuajse çdo kamerë Canon EOS R System ka një veçori që e automatizon këtë proces, duke shkrepur disa fotografi me distancë fokusi në rritje nga shkrepja në shkrepje, që më pas mund t’i kombinoni.

“Veçoria e grupimit funksionon nga pika më e afërt e fokusit në subjektin tuaj,” shpjegon Matt-i. “Ndryshon automatikisht distancën fokale të objektivit, duke shkrepur çdo lëvizje që keni zgjedhur në menu, duke tkurrur në mënyrë efikase skenën.”

Duhet të siguroheni që objektivi juaj është caktuar në modalitetin e vetëfokusimit (AF); për objektiv pa çelës AF/MF, caktoni modalitetin AF në menunë e kamerës. Përdorimi i objektivit me kënd të gjerë do të thotë që mund ta prisni imazhin përfundimtar për t’u siguruar që i gjithë subjekti mbetet në kuadër.

Matt-i e kishte shumë të thjeshtë të konfiguronte dhe përdorte menunë e grupimit të fokusit. “Pasi të keni bërë disa mbivendosje do ta kuptoni se çfarë bën secili opsion,” thotë ai.

Kur të jeni gati, thjesht shtypni butonin e obturatorit për të filluar shkrepjen. Numëruesi në këndin e sipërm të LCD-së tregon numrin e fotove të mbetura.

Canon EOS R7 dhe EOS R10 thjeshtojnë procesin duke mbivendosur automatikisht edhe sekuencën tuaj të imazheve brenda në kamerë, pa qenë nevoja për përpunim në kompjuter. “Aftësia për të krijuar një imazh të kompozuar në kamerë është me të vërtetë revolucionare,” thotë Matt-i. “Imazhet individuale janë të ruajtura krahas imazhit të kompozuar në thellësi, kështu që rezultati shfaqet menjëherë. Megjithatë, teksa kamera ruan kuadrot teke të mbivendosjes, ju mund t’i përpunoni ato vetë ose t’i përdorni individualisht.”

Mbivendosja në kamerë është e disponueshme në çdo modalitet ekspozimi në EOS R7. “Do të sugjeroja që të përdorni modalitetin Manual (M), pasi ju jep kontroll të plotë të kamerës dhe të mënyrës se si do të duket imazhi përfundimtar,” thotë Matt-i. “Do t’ju duhet një shpejtësi më e madhe e obturatorit për të shmangur dridhjet e kamerës kur fotografoni dorazi, e cila mund të arrihet duke caktuar një ISO më të lartë dhe aperturë më të gjerë.”

Është mirë të bëni një shkrepje provë, për t’u siguruar që jeni të kënaqur me cilësimet tuaja, dhe është e rëndësishme që ta mbani kamerën të palëvizshme. “Përdor pothuajse gjithmonë një stativ me mbivendosje të brendshme pasi dua të minimizoj ndikimin tim te lëvizja e kuadrove,” shpjegon Matt-i. Megjithatë, kjo nuk është ideale për subjektet e gjalla. “Në këto raste, shpejtësia më e madhe e obturatorit dhe ISO-ja më e madhe ndihmon në eliminimin e lëvizjeve të paqëllimshme të fotografit,” shton ai. Stabilizuesi i imazhit i integruar në EOS R7 i jep Matt-it më shumë liri për të shkrepur dorazi.

Numri i kuadrove që ju nevojitet të shkrepni varet nga subjekti, por me mbivendosjen në kamerë, Matt-i ka mundur të kombinojë qindra kuadro për subjekte të vogla sa një grimcë kripe. “Për mbivendosjen e peizazheve, normalisht do të përdornit një aperturë më të ngushtë ose një thellësi fushe më të madhe, në mënyrë që të mos keni nevojë të shkrepni aq shumë kuadro, veçanërisht nëse po fotografoni njëkohësisht zona më të mëdha fokusi,” shpjegon ai. Ai shton gjithashtu se puna makro, duke përdorur një thellësi shumë të vogël fushe gjatë mbivendosjes mund të shkaktojë difraksion, që është një efekt optik që kufizon cilësinë e imazheve tuaja, dhe humbje të dritës.

Nëse nuk keni kamerë me funksion të integruar mbivendosje, mund t'i kombinoni imazhet tuaja duke përdorur softuerë si softueri falas i Canon-it Digital Photo Professional (DPP), i cili ka një mjet të dedikuar për kompozimin në thellësi. “DPP-ja do të radhisë dhe përziejë pjesët më të mprehta të secilit imazh për të krijuar një fotografi përfundimtare me një thellësi fushe më të madhe,” thotë Matt-i.

Pavarësisht përqafimit të teknologjisë që kursen kohë të Canon EOS R7 dhe EOS R10, Matt-i beson se mbivendosja manuale e fokusit është ende e dobishme. “Mënyra tradicionale e mbivendosjes së fokusit është më e vështira, por ofron më shumë hapësirë për kreativitet dhe është e aksesueshme për të gjithë,” thotë ai. “Gjithashtu, keni më shumë liri për zgjedhjet e ndriçimit, pasi disa nga veçoritë e integruara nuk funksionojnë me një njësi blici.”

Nëse kamera juaj Canon nuk ofron grupim fokusi ose mbivendosje në kamerë, është e thjeshtë të provoni mbivendosjen manuale të fokusit. “Parimet janë të njëjta, vetëm se përdoruesi duhet ta marrë secilën shkrepje dhe ta përpunojë në një imazh të kompozuar me mbivendosje,” shpjegon Matt-i. Çelësi është ekspozimi dhe fokusi manual. “Fikni vetëfokusimin (AF) dhe fokusohuni manualisht në pikën më të afërt të subjektit tuaj,” thotë ai. “Përdorni modalitetin Live View të kamerës për të zmadhuar subjektin dhe për të siguruar fokus preçiz, nëse mund ta bëjë këtë.”

Ndriçimi është i rëndësishëm pavarësisht se cilën metodë vendosni të përdorni për mbivendosjen e fokusit. Nëse nuk ka mjaftueshëm dritë,shpejtësia e obturatorit mund të jetë shumë e ngadaltë për të ngrirë lëvizjen, por nëse shtoni shumë, rezultati mund të jetë i ashpër. Për Matt-in, “drita natyrale ndihmon shumë në ruajtjen e shkëlqimit dhe ngjyrave të një subjekti, që ndonjëherë mund të duket i sheshtë për shkak të burimeve të jashtme të dritës.”

Matt-i shton ndriçim të jashtëm nëse drita natyrale nuk është e mjaftueshme. "Dritat konstante (LED) janë të aksesueshme, të lehta dhe mund të vendosen kudo rreth subjektit tuaj, duke krijuar kënde më dinamike," thotë ai.

Cilësimet e mbivendosjes së Matt-it nuk ndryshojnë shumë, por ai e ndryshon aperturën e tij në varësi të madhësisë së subjektit, numrit të nevojshëm të mbivendosjeve dhe zmadhimit. “ISO-ja ime është zakonisht rreth 320 gjatë përdorimit të blicit dhe shpejtësia ime e obturatorit është rreth 1/160 sek,” tregon ai.

Menuja e Canon-it për grupimin e fokusit është mjaft e dobishme në shkrepjen e disa imazheve, ndërsa funksioni i teknologjisë së fundit i kompozimit në thellësi brenda kamerës në kameratCanon EOS R10 dhe EOS R7 e thjeshton procesin, duke ju kursyer kohë me anë të eliminimit të nevojës për përpunim të mëvonshëm dhe duke ju mundësuar të fokusoheni më tepër në vendime kreative si kompozimi dhe ekspozimi. Megjithatë, fokusimi manual është një mënyrë shumë e mirë kur keni nevojë për më shumë kontroll.

Matt-i beson se pavarësisht metodës që përdorni, mbivendosja e fokusit e bën të zakonshmen të duket e mahnitshme. “Mbivendosja e fokusit transformon të zakonshmen në të jashtëzakonshme,” thotë ai. Nga makro në peizazhe, mjetet e thjeshta për t'u përdorur të Canon-it për mbivendosjen do t'ju japin mundësinë të kapni imazhe mahnitëse me mprehtësi para-mbrapa.


Shkruar nga Lauren Scott dhe Andrea Ball