Si të realizoni fotografi kreative të festave

Një nga gjërat më të bukura të sezonit të festave janë festat dhe ngjarjet e panumërta që mbledhin miqtë ose familjarët për të gëzuar, për t'u qetësuar dhe për të ruajtur kontaktet. Të dini si të fotografoni buzëqeshjet festive, dritat ndriçuese dhe lëvizjet e çuditshme të kërcimit në mënyrë kreative do t'ju ndihmojë të krijoni kujtime të paharrueshme.

Falë këtyre këshillave dhe teknikave të dobishme për fotografimin e festave, nuk do të realizoni vetëm foto të jashtëzakonshme që të gjithë do t'i pëlqejnë dhe ndajnë, por do të keni imazhe që paraqesin më së miri momentet tuaja të veçanta dhe aq të bukura sa ia vlen të printohen dhe ruhen.

Qoftë në ambiente të jashtme apo të brendshme, në festa subjektet shpesh janë në lëvizje, ndaj është e rëndësishme që të siguroheni që parametrat e caktuara të kamerës suaj janë më të përshtatshmet për fotografimin e festave.

Për të kapur lëvizjen e shpejtë të një piste kërcimi pa blic, do t'ju duhet të siguroheni që shpejtësia e obturatorit është mjaftueshëm e shpejtë. Modaliteti “Shutter priority” (Tv) ju lejon të specifikoni shpejtësinë e obturatorit, teksa kamera përzgjedh aperturën dhe ISO për një fotografi me ekspozim të duhur. Një shpejtësi minimale e obturatorit prej 1/160 ose 1/250 sek është më e mira për lëvizjet, edhe pse me lëvizje më të shpejta mund t’ju duhet ta rrisni deri në 1/1000 sek. Nëse jeni në modalitet Manual (M), sigurohuni që apertura është relativisht e hapur (numër më i ulët F) për të kompensuar shpejtësinë më të lartë të obturatorit. Niseni me Auto ISO, por nëse fotografia juaj është tepër e errët, provoni të vendosni një ISO të mesëm ose të lartë, si ISO 3200 ose ISO 6400.

Nëse festa zhvillohet si mbledhje e ulur, modaliteti Aperture priority (Av) ju lejon të zgjidhni rrezen e qartësisë. Në ambiente më të qeta, mund të vlerësoni cilësimet e kamerës tuaj në varësi të dritës që ofron ambienti. Për shembull, një obturim 1/80 sek është i përshtatshëm për portretet me lëvizje të ngadaltë ose fotografitë në grup. Ai do të lejojë që sensori të marrë më shumë dritë, duke ju dhënë më shumë liri me aperturën tuaj dhe vlerat ISO.

Fotografitë e planifikuara kanë vendin e tyre, por nëse dëshironi të kapni shprehjet e natyrshme të gëzimit në një festë, fotografitë spontane janë të duhurat.

Një objektiv zmadhues, si p.sh. Canon RF-S 18-45mm F4.5-6.3 IS STM, do t'ju ndihmojë të inkuadroni subjektet në distancë dhe do t'ju lejojë të regjistroni pa qenë shumë e dukshme që e keni drejtuar kamerën te dikush në veçanti. Ky objektiv ka gjithashtu një stabilizues imazhi me 4 nivele, që do ju ndihmojë të shmangni turbullimin në fotografi kur fotografoni dorazi.

Në vend që të përdorni blicin e kamerës kur realizoni fotografi spontane, është më mirë të përdorni një aperturë të gjerë dhe një parametër mesatar ose të lartë të ISO-s që subjektet të jenë në fokus dhe të qarta. Në këtë mënyrë, blici nuk do të shqetësojë subjektet tuaj, duke ruajtur një ndjesi natyrale. Për të njëjtën arsye, duhet ta fikni dritën ndihmëse të vetëfokusimit AF të kamerës.

Mbajini pamjet spontane duke vendosur një kamera në distancë si Canon PowerShot PX, e cila në mënyrë inteligjente inkuadron dhe shkrep foto dhe video automatikisht. Duke qenë më praktike se një kamerë tradicionale, ajo ju mundëson që edhe ju të shijoni festën.

Qoftë një mori dritash ndriçuese të pemës së vitit të ri ose një qiri i thjeshtë, periudha e festave është e mbushur me drita të bukura që, me vendosjen e duhur të tyre, mund të kthehen në globe të mrekullueshme ndriçuese në sfondin e fotografive tuaja. Fjala japoneze “bokeh” përdoret për të përshkruar cilësitë estetike të këtyre elementeve të veçanta jashtë fokusit.

Efekti arrihet më lehtësisht kur objektivi juaj është vendosur në aperturën më të gjerë. Kjo rezulton në një rreze të shkurtër qartësie, e cila ju lejon të jeni shumë selektivë me fokusimin tuaj në mënyrë që të mund ta bëni subjektin të dallohet në një sfond të turbullt. Një objektiv ideal për këtë është Canon RF 50mm F1.8 STM, që ofron një aperturë maksimale ultra të gjerë prej f/1.8. Por mund të siguroni po ashtu elemente të veçanta të mjegulluara dhe tërheqëse duke përdorur apertura më të vogla, si p.sh. f/5.6. Rriteni efektin duke rritur distancën mes subjektit dhe sfondit, ose duke qëndruar më afër subjektit tuaj.

Ndërsa shpejtësitë më të larta të obturatorit do t'ju ndihmojnë të kapni me qartësi subjektet në lëvizje, një metodë alternative është të përdorni një shpejtësi shumë më të ngadaltë të obturatorit për të krijuar lëvizje në një skenë me subjektet statike.

Caktoni një shpejtësi obturatori rreth 1/10 sek ose 1/20 sek nëse fotografoni dorazi dhe sigurohuni që një subjekt statik (ose relativisht statik) është i dukshëm qartësisht në skenë. Është një veçori e dobishme nëse objektivi juaj ka stabilizim optik të imazhit (IS) të integruar, si Canon RF 35mm F1.8 MACRO IS STM, pasi kjo do t'ju ndihmojë t'i mbani imazhet më të qarta në shpejtësi më të ulëta të obturatorit. Disa kamera, si Canon EOS R7 dhe EOS R6 Mark II, kanë stabilizim imazhi të integruar (IBIS). Kjo e lëviz fizikisht sensorin e kamerës për të kompensuar për çdo lëvizje kur nuk jeni duke shkrepur nga një pozicion fiks (si për shembull nga një stativ). Ky lloj stabilizimi imazhi do të funksionojë me çdo objektiv.

Nëse po përdorni një stativ, do të mund të përdorni shpejtësi shumë më të ulëta të obturatorit për të arritur këtë efekt. Aktivizoni obturatorin duke përdorur një telekomandë me tela ose pa tela, aplikacionin Canon Camera Connect ose modalitetin e kohëmatësit automatik.

Duke kontrolluar kohën kur kamera aktivizon blicin gjatë ekspozimit, mund të kapni gjurmë dritash plot ngjyra për të transmetuar atmosferën e festës në një mënyrë krijuese, ndërkohë që i mbani subjektet të qarta. Zgjidhni një shpejtësi të ulët të obturatorit me rreth një sekondë dhe zgjidhni mes modalitetit të sinkronizimit të perdes së parë ose perdes së dytë në menynë e opsioneve të blicit në kamerën tuaj.

Sinkronizimi i perdes së parë është opsioni i parazgjedhur në shumicën e kamerave. Ai e aktivizon blicin në fillim të ekspozimit dhe regjistron çdo mjegullim përpara subjektit. Sinkronizimi i perdes së dytë e aktivizon blicin në fund të ekspozimit, duke regjistruar gjurmë dritash dhe detaje të tjera prapa subjektit.

Nëse përdorni blicin, sigurohuni që të jetë konfiguruar në një mënyrë që i përshtatet subjekteve tuaja. Nëse përdorni një blic Speedlite, në vend që ta drejtoni drejtpërdrejt tek objekti që po përpiqeni të regjistroni, drejtojeni në një kënd drejt tavanit që drita të përplaset drejt subjekteve tuaja. Kjo jo vetëm që do të sigurojë një ndriçim më natyral, por do të jetë më e përshtatshme edhe për subjektet tuaja.

Blici Canon Speedlite EL-100 mund të anohet horizontalisht si dhe vertikalisht, duke ju lejuar të zgjidhni këndin më të mirë të reflektimit. Ai vjen gjithashtu me një modalitet automatik, që do të përzgjedhë cilësimet më të mira për ju në varësi të mjedisit që ju rrethon, kështu ju mund të fokusoheni thjesht te shkrepja e fotografisë.

Një mënyrë alternative për të siguruar rezultate të shkëlqyera nga blici juaj është të përdorni një kapak për shpërndarjen ose një kuti të vogël zbutëse mbi kokën e blicit. Kjo do ta shpërndajë dhe do ta zbutë dritën e blicit, duke ju ndihmuar të siguroni tone më natyrale të lëkurës, ndërkohë që kapni dhe ngrini aksionin.

Mos harroni se nuk është e nevojshme që fotografitë e festave të jenë gjithmonë të mbushura me njerëz. Fokusimi në detajet më të vogla mund të jetë ende efikase për të transmetuar atmosferën dhe ndjesinë e rastit.

Nëse nuk mund të afroheni mjaftueshëm me subjektin tuaj me objektivin që po përdorni, merrni në konsideratë një objektiv me mikro aftësi, si Canon RF-S 18-150mm F3.5-6.3 IS STM (në modalitetin MF) ose Canon RF 85mm F2 MACRO IS STM. Ndërsa një opsion relativisht i gjerë, si p.sh. Canon RF 35mm f/1.8 MACRO IS STM, do të bëjë të mundur të afroheni dhe t'ju lejojë përsëri të kapni më shumë nga ambienti, për më shumë kontekst.

Disa kamera EOS R System, si Canon EOS R10 dhe Canon EOS R8, ofrojnë një modalitet të shumëfishtë ekspozimi. Në këtë modalitet shkrepen dhe mbivendosen disa foto, për një efekt artistik. Duke qenë se të gjitha këto bëhen në kamerë, nuk është nevoja të përdoret një softuer modifikimi.

Ka katër modalitete të shumëfishta ekspozimi nga të cilat mund të zgjidhni në varësi të ndriçimit që keni dhe rezultatit që dëshironi, megjithatë mund edhe thjesht të shkrepni duke përdorur kontrollin e ekspozimit “Average” për ta lejuar kamerën tuaj që të gjejë ekspozimin e duhur përfundimtar në vendin tuaj. Mund të zgjidhni edhe të shkrepni vetëm me dy ekspozime, ose të mbivendosni shumë shkrepje të ndryshme për një rezultat hiper surreal.

Shtojini interes vizual fotografive të festave duke eksperimentuar me perspektivën. Kjo mund të jetë po aq e lehtë sa të lëvizni kamerën tuaj më lartë ose më poshtë, por mos ngurroni që ta çoni vertikalitetin në ekstrem, duke shkrepur për sipër nga dyshemeja ose për poshtë nga lartësia e tavanit për një efekt sy shpendi. Shkrepja nga kënde të larta ose të ulëta është e lehtë kur përdorni një kamerë si Canon EOS R50, e cila ofron një ekran rrotullues shumëkëndësh. Ajo është e shkëlqyer edhe për të shkrepur autoportrete argëtuese.

Ndryshoni mënyrën se si fotot tuaja inkuadrohen duke përdorur dyer, dritare ose mbajtëse shkallësh dhe kërkoni sipërfaqe me shkëlqim ose ujë për të kapur reflektimin e festës, ose për t’u përfshirë në fotografi në një mënyrë kreative.

Materialet që ndryshojnë dritën mund të ndryshojnë estetikën e fotove tuaja - shkrepni përmes lëngjeve të palëvizura të tejdukshme, si pijet për të kapur dritën e thyer, e cila tjetërson madhësinë dhe proporcionet. Shkrepja përmes xhamit me motive ose të mjegulluar mund të krijojë një efekt turbullimi të mrekullueshëm.

Luani me të gjitha këto teknika, argëtohuni dhe mos u shqetësoni nëse nuk funksionon, ka të bëjë e gjitha me eksperimentimin.

Shkruar nga Matt Golowczynski dhe Peter Wolinski