Këshilla krijuese për efekte artistike Bokeh

Bokeh është bërë një fjalë e shumëpërdorur në rrethet krijuese. Nga fjala japoneze për "turbullim", ajo përshkruan cilësinë e zonave jashtë fokusi nëpër foto. Efekti i mirë Bokeh është një faktor kyç në teknikën e izolimit të pikës kryesore të interesit në një skenë duke turbulluar ambientin rrethues, ndaj dhe është veçanërisht efikas në portrete dhe fotot e natyrës së qetë. Mund të mësoni më shumë në udhëzuesin tonë të efektit Bokeh për fillestarë.

Efekti i bukur Bokeh është një element qendror i stilit të shkrepjes së Rosie Lugg. Përveç të qenit një fotografe e suksesshme, Rosie është dhe një krijuese e thekur e TikTok, duke publikuar video udhëzuese që u tregojnë fotografëve aspirantë këshilla dhe teknika të reja, hap pas hapi. Këtu ajo shpjegon si të bëheni krijues me efektin Bokeh, duke e ngritur nga një efekt i thjeshtë turbullimi në diçka vërtet artistike.

Mundësia për të shfokusuar zonat e sfondit brenda një skene është jetike për efektin Bokeh. Ju duhet një rreze e ulët qartësie, por kjo mund të jetë e vështirë për t'u arritur nëse shkrepni me celular. Efektin Bokeh mund ta realizoni lehtësisht me kamerë me sensor të madh figure, si p.sh. shumë prej kamerave pa pasqyrë të Canon ose duke përdorur objektiva me apertura të gjera, apo edhe objektiva telefoto.

Çdo kamerë Canon mund të realizojë figura me efekt të mirë Bokeh, dhe Rosie mbështetet mbi modelin e saj Canon EOS 200D (i tejkaluar tanimë nga Canon EOS 250D) për t'ia arritur kësaj, por një kamerë kuadërplotë, si p.sh. Canon EOS RP ose EOS R6 janë gjithashtu të mjaftueshme. Objektivat e shpejtë fiksë janë idealë dhe ka disa opsione të jashtëzakonshme, si p.sh. Canon EF 50mm F1.8 STM.

Opsionet e EOS R System përfshijnë Canon RF 50mm F1.8 STM, që jep një perspektivë shumë natyrale. Për një kënd më të gjerë shikimi, modeli Canon RF 35mm F1.8 MACRO IS STM është një zgjidhje e mirë, ndërsa për portrete, ideal është Canon RF 85mm F2 MACRO IS STM. Gjatësia e shkurtër fokale telefoto i mundëson një distancë komode shkrepjeje pa e mbingarkuar subjektin dhe ka një perspektivë të këndshme dhe disi të sheshtë. Të dy këta makroobjektiva kanë distancë shumë të shkurtër fokusimi, çka ndihmon dhe në arritjen e një rrezeje qartësie shumë të goditur.

Paraqitja e efektit Bokeh ndikohet dhe një sërë fletësh aperture në objektivat tuaj – përgjithësisht, sa më shumë aq më mirë për efekt tërheqës Bokeh. Canon RF 35mm F1.8 MACRO IS STM dhe Canon RF 85mm F2 MACRO IS STM kanë nënte fletë aperture, ndërsa Canon RF 50mm F1.8 STM ka shtatë të tilla.

"Më pëlqen të shtoj ca magji në pozat e mia me elemente të personalizuara efekti Bokeh," - vijon më tej Rosie. "Ato madje mund të krijohen me lehtësi. Thjesht merr një copë letër apo kartë dhe e vendos në tryezë, pastaj vendos objektivin mbi të, me anën e parme përmbys, dhe vizaton një kontur sipas perimetrit. Në vijim e pret sipas konturit, duke lënë disa veshë që të mund ta palosësh mbi objektiv. Këto mund t'i përdorësh për të mbajtur shablloni të fiksuar në vend me ndonjë llastik."

"Kam përdorur dy modele për këtë projekt," - thotë Rosie. "Për pozën e gotës me avull dhe zemra dashurie (më poshtë) bëra një prerje në formë zemre, ndërsa për autoportretin vendosa për një yll." Efekti Bokeh në formë zemre mund t'u japë fotove tuaja të dasmës apo të Shën Valentinit një ndjesi vërtet romantike, ndërsa yjet do të ishin një shtesë argëtuese në pozat e ditëlindjes ose për festimet e stinës.

"Mund të ketë nevojë për më shumë prova për të gjetur madhësinë e duhur për efektin optimal, në varësi të kamerës dhe objektivit që përdorni, por në fund ia vlen," - shton Rosie. "Për objektivat me rreze më të ulët fokale, si Canon RF 35mm F1.8 MACRO IS STM, provoni të përdorni prerje më të vogla."

"Për të krijuar forma efekti Bokeh në imazhin tuaj, ju duhen disa drita. Çdo dritë e shfokusuar do të marrë formën e prerjes, ndaj një tel me drita dekorative në sfond është ideal. Varini në rresht ose bëjini bashkë – sido që t' dalë më bukur për foton që doni të krijoni. Për të ndriçuar objektin kryesor në plan të parë, do t'ju duhet një dritë njëshe më shndritshme. Mos u shqetësoni nëse nuk keni dritë fotografike. Një abazhur tryeze apo ndriçimi i dhomës mjafton ose mund dhe të përdorni dritën e paradites që hyn nga dritarja."

Rosie-t i pëlqen të shtojë dhe një dorë ngjyra. "Një nga stilet e mia të preferuara është të përdor ndonjë CD të vjetër për të pasqyruar dritën kryesore, që të hedhë drita të ndryshme mbi subjekt. Mund ta ndryshoni pozicionin dhe këndin e diskut për të rregulluar efektin."

"Për të maksimizuar turbullimin në sfond, përdorni aperturën më të gjerë të objektivit tuaj," - thotë Rosie. "Unë përgjithësisht shkrep në modalitetin Manual (M). Fillimisht vendosni numrin më të vogël f-, pastaj zgjidhni një shpejtësi të mjaftueshme të shkrehësit për të evituar turbullimin nga lëvizja. Më e mira është ta vendosni kamerën në stativ dhe të përdorni shpejtësi shkrehësi prej të paktën 1/125 sek për portretet, por dhe shpejtësi më të vogla janë në rregull për poza natyre të qetë pa lëvizje. Shqyrtojeni foton në inkuadruesin elektronik (EVF) ose në ekranin e pasmë të një kamere pa pasqyrë ose në ekranin e pasmë të një DLSR në modalitet Live View dhe rrisni cilësimin e ISO nëse figura duket shumë e errët. Unë përpiqem të mos shkoj mbi ISO400 me Canon EOS 200D, që pozat të duket sa më të detajuara dhe pa zhurmë të jetë e mundur, por mund të shkoni dhe shumë më lart me kamerat e reja pa pasqyra të Canon EOS R System."

"Për autoportrete mund të kisha përdorur ekranin rrotulluese që vjen në shumë prej kamerave të Canon, por më pëlqen të përdor programin Canon Camera Connect në telefon," - thotë Rosie. "I bën gjërat të lehta. Mund ta shqyrtoni imazhin në telefonin tuaj në kohë reale dhe të prekni ekranin për të zgjedhur pikën ku të vetëfokusoheni. Për portrete do të jetë kryesisht syri që është më pranë kamerës. Është gjithashtu e dobishme të përdorni vonesën dysekondëshe të vetëkohëmatësit të kamerës. Kjo ju jep kohë të mjaftueshme për ta lënë telefonin diku dhe për të marrë pozë përpara se të shkrepet fotoja."

Pasi t'u keni marrë dorën elementeve bazë, mund të përdorni të njëjtat teknika për t'u dhënë portreteve tuaja të familjes dhe të shoqërisë një pamje të veçantë. Rosie thotë se ia vlen të provoni gjëra të ndryshme me kompletin tuaj. "Mund të ndryshoni rrënjësisht pamjen dhe ndjesinë e shumë fotove thjesht duke ndryshuar pozicionin e subjektit dhe të kamerës, ose duke shkrepur nga kënde të ndryshme. Ndryshimi i distancës mes objektit në plan të parë dhe dritave dekorative në sfond mund të ketë një impakt edhe më të madh. Më pëlqen të shtoj rekuizita shtesë dhe ndriçim me ngjyra të ndryshme për të krijuar atmosferë. Thjesht lëreni imagjinatën të shfrenuar."

U frymëzuat nga këto teknika krijuese? Shikoni këshillat e Rosie-t për përdorimin e formave të efektit Bokeh për të krijuar efekte të bukura me dritat në TikTok dhe pastaj provoni shtimin e disa efekteve argëtuese në imazhet tuaja. Ndajini rezultatet me etiketën #FreeYourStory dhe referoni @canonemea.


Shkruar nga Matthew Richards