Fotografia e lëvizjes: Si të shkrepni lëvizjen në fotot tuaja

Nga fëmijët dhe kafshët shtëpiake që luajnë në kopsht, deri në rrjedhat e ujëvarave në peizazhe, sportet e aksionit dhe më tej - fotografia ju jep mundësinë ta shkrepni jetën në lëvizje, në një foto të vetme.

Si fotograf, ju keni dy zgjedhje kryesore. Ose mund ta fiksoni aksionin për të shkrepur një çast definitiv ose mund të përdorni turbullimin e lëvizjes për t'i dhënë një ndjesi lëvizjeje dhe shpejtësie. Kamera juaj Canon vjen përplot me teknologji që mund ta shfrytëzoni për të dyja qasjet, siç shpjegojmë këtu.

Faktori më i rëndësishëm në mënyrën se si shkrepni lëvizjen në fotot tuaja është kontrolli i shpejtësisë së shkrehësit të kamerës. Do të ishte mirë ta provonit dhe të luanit ca me shpejtësinë e shkrehësit derisa të gjeni atë që ju bën më mirë punë juve. Shumica e kamerave pa pasqyrë EOS kanë një shpejtësi maksimale të obturatorit prej 1/4000 sek ose 1/8000 sek, ndërsa disa kamera pa pasqyrë EOS ju japin mundësinë të përdorni obturatorë elektronikë për shpejtësi edhe më të larta obturatori. Në anën tjetër, shpejtësitë e ulëta të shkrehësit bëjnë të mundur që objektet në lëvizje të marrin turbullim natyral, çka mund të jetë shumë efikas në krijimin e një ndjesie të lëvizjes.

Modaliteti i shkrepjes Tv (Time Value) në kamerat pa pasqyrë të Canon njihet shpeshherë si modaliteti prioriteti i obturatorit (Shutter Priority). Është optimal për fotografinë e lëvizjes, pasi thjesht mund të zgjidhni shpejtësinë e shkrehësit që dëshironi të përdorni, dhe sistemi i matjes së kamerës e rregullon automatikisht aperturën për ekspozimin e duhur.

Por në kushte të caktuara shumë të ndritshme ose të errëta të ndriçimit, diapazoni i shpejtësive të shkrehësit që keni në dispozicion mund të jetë i kufizuar. Kjo mund të bëjë që kur të shkrepni në ndriçim të ulët të mos keni mundësinë të përdorni shpejtësi të mjaftueshme të shkrehësit për të fiksuar subjektin, ose në ditë me ndriçim të lartë që mos mund ta zgjasni ekspozimin mjaftueshëm për të marrë dhe turbullimin krijues. Mënyra më e lehtë për ta zgjidhur këtë është përdorimi i modalitetit ISO të kamerës së bashku me modalitetin Shutter Priority. Kamera juaj pastaj e cakton automatikisht ndjeshmërinë që të mund të shkrepni në këto shpejtësi të larta ose të ulëta të shkrehësit.

Një shpejtësi e shkrehësit prej 1/250 sek duhet të jetë e mjaftueshme për të fiksuar njerëzit që ecin, ndërsa 1/500 sek është më mirë nëse subjekti juaj lëviz pak më shpejt. Për objekte më të shpejta si makinat dhe zogjtë në fluturim, preferohen shpejtësitë e shkrehësit prej 1/2000 sek, 1/4000 sek e lart. Është e rëndësishme të eksperimentoni me shpejtësi të ndryshme të shkrehësit derisa të gjeni çfarë ju bën punë - dhe mos harroni të argëtoheni!

Fëmijët e vegjël dhe qentë kanë tendencë të lëvizin shpejt dhe shpesh në mënyrë të çrregullt, kështu që një shpejtësi shkrehësi prej 1/1000 sek duhet të jetë e mjaftueshme, e njëjta vlen dhe në shkrepjen e sportistëve.

Modaliteti Kids and Pets që vjen shpesh në kamerat PowerShot përdor kuadro fokusimi të shumëfishtë për të siguruar që vetëfokusimi të kryhet mirë, duke ndjekur subjektet. Për kamerat EOS që nuk kanë modalitet Kids and Pets, kaloni në Servo AF (vetëfokusim i vazhduar).

Modaliteti Sports Scene që vjen me shumicën e kamerave Canon është një pikënisje e mirë për fiksimin e aksionit të shpejtë. Ai ndryshon parametrat e shkrepjes së kamerës për të favorizuar shpejtësitë e larta të shkrehësit, si dhe gjurmimin e subjekteve në lëvizje me anë të Servo AF dhe shkrepjes në seri të pozave të shumta me modalitetin Continuous Drive. Megjithatë, për të krijuar turbullim të lëvizjes në pozat tuaja sportive, më mirë kaloni në modalitetin Tv (Shutter Priority) dhe caktoni shpejtësinë e shkrehësit që kërkoni.

Kamerat Canon EOS R System përfshijnë Eye AF në modalitetin e gjurmimit, duke i mundësuar kamerës të identifikojë dhe fiksojë fokusin te sytë e subjektit, që është një mënyrë e qëndrueshme për ndjekjen e subjektit tuaj kur është në lëvizje.

Shpejtësitë e ulëta të shkrehësit dhe ekspozimet e gjata ju mundësojnë krijimin e turbullimit të lëvizjes në foto. Edhe një herë, shpejtësia e subjektit në lëvizje përcakton sa e ulët duhet të jetë shpejtësia e shkrehësit.

Një shpejtësi shkrehësi prej 1/30 sek bën punë për biçikletat, ndërsa shpejtësia e shkrehësit midis 1/60 sek dhe 1/125 sek bën punë për makinat dhe motoçikletat. Nëse doni të turbulloni një ujëvarë, më e mira është një ekspozim relativisht i gjatë prej 3-5 sekondash. Kjo gjithashtu funksionon mirë për "turbullimin" e njerëzve në poza ku janë duke ecur atypari, duke i hequr kështu praktikisht nga fotot arkitekturore të skenave të rrugëve ose të monumenteve të frekuentuara.

Në dritën e ditës, mund të jetë e vështirë të arrihet shpejtësi shkrehësi për kohë të mjaftueshme sa të krijohet turbullimi i lëvizjes, edhe nëse përdorni aperturë të ngushtë. Për ta shmangur këtë mund të vendosni një filtër ND (Neutral Density) përpara objektivit për të ulur sasinë e dritës që bie në sensor, duke ju lejuar të zgjasni ekspozimin. Në disa raste, ekspozimi juaj mund të shkojë përtej 30 sekondave. Me ç'rast zgjidhni modalitetin manual të kamerës dhe përdorni cilësimin Bulb.

Kur jeni në kontroll të shpejtësisë, mund të bëheni vërtet krijues me videot. Fotografia e intervaleve shkrep një sërë kuadrosh në intervale të rregullta për të dhënë efektin e përshpejtimit të lëvizjes ose të kohës. Duhet të nxirrni një sekuencë fotosh në intervale të rregullta - mësoni më shumë në udhëzuesin tonë për intervalet.

Shumica e kamerave EOS R System kanë edhe një modalitet të integruar filmimi me interval, për ta bërë edhe më të thjeshtë për regjistrimin e videove mbresëlënëse.

Zgjidhni modalitetin e shkrepjes Tv dhe synoni për një shpejtësi obturatori prej rreth 1 deri në 4 sekonda. Zmadhoni dhe vetëfokusojeni me një shtypje të lehtë të butonit të shkrehësit. Në vijim, shtypeni plotësisht butonin e shkrehësit për të filluar ekspozimin, dhe në rreth gjysmë të rrugës filloni të zvogëloni pamjen duke përdorur unazën e zmadhimit të objektivit. Synoni që ta përfundoni ndryshimin e zmadhimit në të njëjtën kohë që mbaron ekspozimi. Përndryshe, mund të filloni me objektivin të zvogëluar dhe zmadhoni gjatë ekspozimit.

Shkrepja e gjurmëve të dritës nga makinat në lëvizje është një mënyrë e mirë për të dhënë një ndjesi të lëvizjes. Në errësirë ka pak gjasa për mbiekspozim, ndaj mund të përdorni ekspozimin Bulb dhe ta lini shkrehësin të hapur për disa minuta nëse është nevoja, për të marrë sa më shumë gjurmë drite në pozë. Vetëm sigurohuni që kamera të jetë e montuar në një stativ apo suport tjetër të fortë dhe pa dridhje.

Një tjetër stil është të përdorni një pistoletë blici për të ndriçuar një automjet në lëvizje, që përveç shkrepjes së gjurmëve të dritës, të ekspozohet mirë edhe makina, motori, treni apo edhe biçikleta. Do t'ju duhet ta konfiguroni pistoletën blic në modalitetin e blicit të perdes së pasme, që blici të shkrepet në fund të ekspozimit dhe jo në fillim. Me blicin e zakonshëm të kamerës, gjurmët e dritës do të zgjaten përpara mjetit në lëvizje dhe jo pas tij.

Kur punoni me shpejtësi të ulëta shkrehësi për të krijuar turbullim të lëvizjes, dridhja e kamerës është një rrezik gjithnjë e pranishëm, sidomos me objektivat telefoto, duke rezultuar dhe në turbullimin e subjektin kryesor. Fotostabilizimi mund të jetë një ndihmë e madhe. Disa objektiva Canon IS (Image Stabilizer) kanë zbulimin automatik të panoramimit, i cili zbaton korrigjimin vetëm në planin vertikal kur jeni duke panoramuar horizontalisht.

Objektivat e tjerë të Canon kanë fotostabilizues të ndryshueshëm në dy modalitete, ku modaliteti 1 është për shkrepje statike dhe modaliteti 2 për panoramim. Disa objektiva, si p.sh. Canon RF 70-200mm F2.8L IS USM, kanë edhe një modalitet të tretë të ndryshueshëm stabilizimi, që përdor stabilizimin vetëm gjatë ekspozimeve konkrete. Kjo mund ta bëjë më të lehtë ndjekjen e subjekteve me lëvizje të çrregullt në inkuadrues.

Disa kamera të tilla si Canon EOS R7 dhe EOS R6 Mark II përfshijnë edhe IBIS (fotostabilizim të integruar). Për rendiment më të lartë, ky mund të funksionojë së bashku me fotostabilizuesit e objektivave me stabilizim optik.

Për më shumë, lexoni udhëzuesin tonë Këshilla panoramimi për pozat e aksionit.

Shumica e kamerave EOS R System përfshijnë funksionin ekspozime të shumëfishta (Multiple Exposure). Këtë mund ta përdorni së bashku me modalitetin Continuous Shooting për të kapur faza të shumta të aksionit në një kuadër të vetëm. Do të keni rezultate më të mira nëse ka një dallim të qartë midis subjektit dhe sfondit, për shembull me një subjekt të çelët përkundër një sfondi të errët ose anasjelltas. Për më shumë informacion, shikoni udhëzuesin tonë Shkrepja me ekspozim të shumëfishtë (ofrohet në gjuhë të zgjedhura).

Një tjetër mundësi është të përdorni një blic ose Canon Speedlite. Nëse shkrepni një sërë blicesh gjatë një ekspozimi të gjatë mund të kapni një subjekt në lëvizje në pika të ndryshme përgjatë rrugës së tij, përkundër një sfondi të palëvizshëm.

Filmat mund të duken shumë më dinamike nëse e lëvizni me kamerën gjatë shkrepjes në vend që ta fiksoni në një pikë mbi stativ. Shumë nga kamerat Canon R System pa pasqyrë përfshijnë fotostabilizimin dixhital gjatë filmimit (Movie Digital IS). Kjo është një formë fotostabilizimi elektronik e posaçme për filmime, që mund të heqë dridhjen e kamerës dhe t'ju japë rezultatet shumë më të qëndrueshme. Mund të punojë gjithashtu me fotostabilizimin optik në objektiva dhe fotostabilizimin e integruar në kamerat Canon EOS R5 Mark II dhe R6 Mark II.


Shkruar nga Matthew Richards