Zotërimi i artit të ekspozimit të gjatë në bardhezi

Stephen McNally e ka zotëruar fotografinë bardhezi me ekspozim të gjatë, me një sërë ekspozitash nga pas dhe me një etje të rritur për këtë zhanër me kalimin e viteve. Duke punuar si parukier, fotografia e tij e detyron të dalë jashtë, të kërkojë vende të reja, të shohë vende të njohura me sy të freskët dhe i jep atij kënaqësi të madhe.

Këtu, ne zbulojmë se si puna e Stephen-it ka evoluar për sa i përket procesit dhe kompletit - dhe pse ai është kaq entuziast për teknikën.

Stephen-i e nis me shkrepjen e temave të njohura, si p.sh. peizazhe detare në perëndim dhe lindje të diellit, por vendosi të kalojë në diçka që e pa si më sfiduese. “Thjesht u lodha duke e bërë këtë, po e bënin të gjithë. Doja ta sfidoja më shumë veten dhe të bëja më shumë me kamerën”, - shpjegon ai.

Përveç krijimit të një elementi surreal në një fotografi, një pjesë e madhe e tërheqjes nga ekspozimi i gjatë është elementi i befasisë – ju nuk e dini se si do të duket pamja derisa të mbyllni shkrehësin dhe të shihni ekranin. Kur shkrehësi i kamerës qëndron hapur për një periudhë të gjatë, kapet një gjurmë lëvizjeje e krijuar nga objekte që lëvizin natyrshëm si uji, retë apo edhe njerëzit. Kjo pjesë e pamjes është në kontrast me subjektet e palëvizshme në skenë, të cilat mbeten të mprehta.

Siç thotë Stephen-: "Ndjesia eterike e fotografisë më tërheq. Fotografia me ekspozim të gjatë rrafshon detin, edhe pse syri mund të shohë valë të mëdha që hyjnë dhe dalin. Të gjithë këtë mund ta ndaloni me një foto me ekpsozim të gjatë – kjo është magjia e saj.”

Stephen-i u kthehet herë pas here të njëjtave vende në veriperëndim të Anglisë. Ai ka pemët e tij të preferuara dhe i pëlqen të shohë se si ndryshojnë gjatë stinëve. Kur ndodhet në ndonjë vend të ri, fillimisht vrojton peizazhin dhe fikson me mendje pikat të cilave mendon t'u rikthehet.

Nëse jeni duke shkrepur peizazhe deti, "duhet të njihni baticat", - vë në dukje ai. “Unë zakonisht fotografoj zbaticën. Nëse fotografoni baticën, do të shihni se kamera lëviz gjatë ekspozimit, ndaj dhe pamjet nuk do të jenë të qarta. Është shumë më e fortë në rastin e zbaticës.

Stephen-i ka prirjen të shkrepë gjatë vjeshtës, pasi është më mirë kur ke mbulimin e ditëve me re për të kapur një ekspozim të gjatë të qiellit, pasi natyrshëm lejon të hyjë më shumë dritë në kamerë. “Unë nuk xhiroj në mes të verës pasi do të më duhej të largohesha në orën 2 të mëngjesit, ndaj zakonisht filloj në shtator pasi agimi është rreth orës 6 të mëngjesit. Unë i studioj vendndodhjet, kur do të lindë dielli dhe ku do të bjerë drita. Nëse është mugët dhe pjesërisht me re, e di që do të kem diçka për të punuar," - shpjegon ai. Ai fillon duke parë një histogram në kamerë për të përcaktuar dritën e disponueshme dhe sa kohë do të ketë.

Ka një atmosferë melankolike në fotot e Stephen-it, e cila është pjesërisht për shkak të vetë temës. Ai ka prirjen të përqendrohet në monumentet industriale ose ndërtesat e braktisura - vende tani të lëna pas dore që dikur ishin plot jetë. “Më tërheqin ndërtesat e vjetra”, - thotë ai. "Kur isha në Anglesey në Uells kohët e fundit, rastisa në këtë shtëpi të vjetër ferme (shih foton djathtas lart) dhe mendova, sa kohë ka qenë vallë kjo fermë në rrënoja? Dhe pse u desh të hiqnin dorë nga mirëmbajtja e saj? Ku janë njerëzit që kanë jetuar dhe punuar atje?"

Këto kujtime të së kaluarës janë gjithashtu të përshtatshme për fotografinë monokromatike. “Me fotografinë bardhezi, kompozimi bëhet fokusi, ndaj duhet të jetë i fortë”, - shton ai.

Ndërrimi i kamerës i mundësoi Stephen-it ta përshtatë procesin e tij. Ai filloi me një Canon EOS 450D (pasuar tanimë nga Canon EOS 850D), përpara se të kalonte në një Canon EOS 60D (pasuar tanimë nga Canon EOS 90D) dhe së fundmi, Canon EOS R6. Pavarësisht kalimit në modelet pa pasqyrë, Stephen-i është ende në gjendje të përdorë objektivat e tij të preferuar EF pa asnjë ndikim në cilësi me anë të Canon Mount Adapter EF-EOS R.

“Më pëlqen ekrani me prekje te Canon EOS R6, është shumë intuitiv. Thjesht prek ekranin për të ndryshuar f-stop ose ISO", - thotë ai.

Stephen-i shpesh fotografon në modalitetin Bulb, çka i mundëson ta mbajë të hapur diafragmën për aq kohë sa gishtin e ka mbi butonin e shkrehësit. Përdorimi i lirimit me tel ndihmon të shmangni dridhjet e mundshme të kamerës që shkaktohen nga mbajtja e shkrehësit. "Modaliteti Bulb është thelbësor për mbajtjen e shkrehësit të hapur për periudha të gjata ndërsa shkrepni në errësirë ​​ose me filtër ND [densiteti neutral] me 10 ose 16 nivele", - thotë ai.

Stephen-i shpesh merr me vete kamera të ndryshme për fotografimet dhe si një mënyrë për të kaluar kohën. Kur është duke marrë një ekspozim 20-minutësh me Canon EOS R6, ai mund të konfigurojë një kamerë tjetër nga një kënd tjetër dhe kjo e mban të zënë ndërsa është duke pritur.

Instrumenti më i fundit në çantën e Stephen-it është programi i tij i redaktimit. Ai shkrep në RAW dhe me ngjyra, çka i jep më shumë informacion për të punuar gjatë redaktimit. Më pas ai e kthen pamjen në bardhezi përpara se ta redaktojë në programe si Adobe Photoshop ose Canon Digital Photo Professional (DPP). "Unë rregulloj nivelet dhe kurbat dhe shtoj disa gradientë. Nëse ndodh të punoj me një skedar për më shumë se 10 minuta, duhet fshirë. Dua të shmang redaktimet e tepruara, ndaj mundohem ta kap saktë që nga kamera”, - shpjegon ai.

Kërkimi për fotografinë e arrirë në ndriçim të ulët dhe ekspozim të gjatë është një sfidë më vete. "Nëntë nga 10 raste do të dështosh," - shpjegon Stephen-i. "Më e mira që mund të bësh për ata që duan ta eksplorojnë si zhanër, është të eksperimentojnë dhe të dalin që me dritën e parë," - shton ai.

"Pasja e një filtri ND, me 10 nivele e lart, do të ishte diçka e dobishme. Përndryshe, shkrepni në dritë të ulët, pak para agimit. Do të merrni ekspozime deri në 50 sekonda para agimit, çka dhe duhet të japë rezultate të shkëlqyera. Unë përdor dhe filtra ND me gradacion të anasjellë kur është më errët në horizont, pasi kjo do të jetë pika më e çelët kur të lindë dielli."

Gjeni një vend, studiojeni vendndodhjen, shfrytëzoni mëngjesin herët dhe provoni teknikën e Stephen-it për të nxjerrë foto bardhezi me ekspozim të gjatë. Këshilla e fundit e Stephen-it është: "Gllabëroni sa më shumë informacion që të mundeni dhe më pas vëreni në jetë. Kurrë nuk do ta merrni atë që dëshironi nëse nuk i bëni përpjekjet."



Shkruar nga Natalya Paul